Дзӕуджыхъӕуы дыккаг экономикон форумы ныхас кӕнгӕйӕ, Мӕскуыйы М. Ломоносовы номыл паддзахадон университеты экономикон факультеты декан Александр Аузан куыд загъта, афтӕмӕй амалиуӕгадмӕ ӕмӕ ахуырадмӕ бӕллицы, стӕй коллективизмы фӕрцы цӕгатирыстойнӕгтӕн уыдзӕн республикӕйы экономикон рӕзтӕн ахъаз кӕныны фадат.
— Цӕгат Ирыстоны паддзахадон университеты ахуыргӕндтӕ ӕмӕ республикӕйы Хицауады специалисттимӕ мӕ ӕрныхас кӕнын фӕнды, ногдзинӕдты уӕрӕсейаг компаниимӕ цы иртасӕн куыст бакодтам, уый бӕрӕггӕнӕнтыл. Куыд раиртӕстам, афтӕмӕй ирон адӕмы иуӕй-иу миниуджыты фӕрцы ис республикӕйы технологон амалиуӕгады рӕзтӕн ахъаз кӕныны фадат. Уӕ авналӕнтӕ сты хох, сӕрвӕттӕ ӕмӕ ӕрдзон хӕзнатӕ нӕ, фӕлӕ адӕм. Уыдон се ‘рхъуыдыдзинӕдты фӕрцы кӕй рауадзынц, уыцы продукци бафты дунеон базармӕ. Ӕхцаимӕ абаргӕйӕ, адӕймаджы капиталӕн ис фылдӕр ахадындзинад. Ацы ӕууӕлы ӕххуысӕй адӕймаджы капитал кӕй скусдзӕн, ууыл зӕрдӕ дарӕн ис, — загъта Александр Аузан.
Уӕ зӕрдыл уын лӕууын кӕнӕм, Дзӕуджыхъӕуы 2-аг экономикон форумы сӕйраг темӕ уыд: «Регионы экономикӕйы уавӕр ӕмӕ йӕ фидӕн». Ӕмбырд саразынӕн фадӕттӕ сарӕзтой Цӕгат Ирыстоны Хетӕгкаты Къостайы номыл паддзахадон университет ӕмӕ нӕ республикӕйы Хицауад.