Цæгат Ирыстоны Хетæгкаты Къостайы номыл паддзахадон университет Насир ад-Дин Тусийы номыл Технологион университетимæ баныхас кодтой наукон æмархайдыл.
Фидыд ратдзæн фадат уæлдæр ахуырадон уагдæттæн иумæйаг наукон-иртасæн куыст кæнын физикæ æмæ химийы малекулярон хуызивтæй æмæ здæхт цæудзæн кæрæдзийæн фæлтæрддзинад æмæ компетенцитæ амонынмæ.
Æмгуыстад бафыстой ацы бонты Тегераны университеты Уæрæсейы Федерацийы æмæ пысылмон Республикæ Ираны ректорты VII Форумы куысты фæлгæтты. Университетты ректортæ, ахуырадон æмæ наукон уагдæтты минæвæрттæ æрныхас кодтой дыууæ бæстæйы наукон æмæ ахуырадон сгуыхтытыл æмæ æмгуысты гæнæнтыл.
Цæгат Ирыстоны Хетæгкаты Къостайы номыл паддзахадон университеты номæй форумы уыдысты ректор Огъуаты Алан æмæ университеты ирайнаг культурæ æмæ фарсийы æвзаджы Центры директор Сохиты Мæдинæ.
Огъуаты Алан Форумы дыккаг бон тематикон сессийы бакаст йæ доклад Ираны уæлдæр ахуырадон уагдæттимæ æмгуысты фæлтæрддзинады фæдыл.
Огъуаты Алан радзырдта, Уæрæсейæн Иранимæ æмгуысты бастдзинæдтæ куыд сырæзтысты, уый, уæлдайдæр та Цæгат Ирыстонимæ. Фæнысан кодта, республикæтæ баст кæй цæуынц сæ равзæрды гуырæнтæй. Сæ культурæ æмæ се ‘взæгты хæстæгдзинадæй, наукон классификацимæ гæсгæ, ирайнаг къорды индоевропæйаг æвзæгты бинонтæм кæй хауынц, уымæй.
Ректор бæстон радзырдта ЦИПУ ирайнаг æмкусджытимæ иумæ кæй æвразынц уыцы проекттыл, ахуырадон программæтыл, конференцитыл æмæ æрбадтытыл.
«Цæгат Ирыстоны паддзахадон университеты бирæ азты цæуы ирайнаг наукон æмæ ахуырадон уагдæттимæ æмгуыстыл архайд. 2014 азы ЦИПУ-йы байгом ирайнаг культурæйы Центр, ахуыр дзы кæнынц персайнаг æвзаг, аразынц семинартæ, культурон-рухстауæн мадзалтæ. Уыдоны фæрцы сæ архайджытæ базонгæ вæййынц Ираны культурæимæ, традицитимæ æмæ сæрмагонд политикон цаутимæ», – загъта Огъуаты Алан.
Форумы кæронбæттæны ректорæн балæвар кодтой зæрдылдарæн æвзист згъæрæхца, ирайнаг культурæ æмæ фарсийы æвзаджы Центры директор Сохиты Мæдинæйæн та ирайнаг традицион нывæфтыд вазæ.
СОГУ и Технологический университет Ирана договорились о научном сотрудничестве