Цæгат Ирыстоны Хетæгкаты Къостайы номыл паддзахадон университеты размæдзыд проекттæ æмæ фæсивæды ‘ргом наукæмæ раздахыны тыххæй Пятигорскы Регионалон информацион центр «ТАСС Кавказ»-ы пресс-конференцийы радзырдта университеты наукон дæсныйады проректор Тенгиз Тиникашвили.
Проректор дзырдта университеты размæдзыд эксперименталон райрæзтытыл физикæ æмæ химийæ. Ахуыргæндтæ патент кæмæй райстой, уыцы райрæзт æрмæгæн йæ бон кæй у батайын кæнын нефты продукттæ æмæ пластмассæ хæрз цыбыр рæстæгмæ, йæ бон кæй у Сау денджызы экологион бæллæхы фæстиуджытæ фæивар кæнын.
Физикты иннæ къорд эксперименттыл кусы тагъддæр кæныны комплекс NICA-йы. ЦИПУ-йы ахуыргæндтæ Дубны ядерон раиртæстыты иугонд институтимæ иумæ кусгæйæ аразынц уæззау ионтæ æмæ элементарон иуæгты фæнысан кæныны гарз. Ахæм иртæстытæ баххуыс уыдзысты Дуне æмæ йæ райрæзты закъонтæ бамбарынæн, стæй фидæны ссарын энергийы æндæр гуырæнтæ.
Химикты къорд архайынц фармакологион æгъдауæй нысаниуæгджын баиугæндты синтезы методты райрæзтыл. Раиртæстæй спайда кæнæн уыдзæн медицинæ æмæ фармацевтикон химийы, уый та феххуыс уыдзæн хосы аргъ фæныллæгдæр кæнынæн æмæ йæ уæд æлхæнгæ дæр кæндзысты хуыздæр.
Университеты биологтæ кусынц атеросклерозы миниуджытæ рагацау сдзæбæх кæнынæн кæрдæджыты хостыл. Ахуыргæндтæ фæлварынц, кæсынц цалдæр хуызы кæрдæджыты миниуджытæм, цæмæй бамбарой фидæны хосы пайда. Иртасæны фыццаг хай æххæстгонд уыдзæн хæстæгдæр мæйты. Дзырдта, куыд ис наукæмæ фæсивæды раздахæн æмæ æрыгæттæн баххуыс кæнæн, уый фæдыл.
«Цæмæй фæсивæд наукæйыл æнувыд уой, уый тыххæй нæ наукон раиртæстыты куратортæ, проектты разамонджытæ сæ къордтæм алы хатт райсынц аспирантты, æрыгæттæ вæййынц фæлтæрд ахуыргæндты æмрæнхъ. Уый сын дæтты фадат, фыццаджыдæр сæ диссертацитæн аналитикон æрмæг æрæмбырд кæнынæн, стæй ма алыхуызон грантты архайын. Исын мызд сæ куыстæн. Уымæй уæлдай ма университеты ис аспирантурæйы ахуырадон программæ, кæцыйæн студенты бæсты университет фиды йæхæдæг»,– загъта Тенгиз Тиникашвили.