Цæгат Ирыстоны Хетæгкаты Къостайы номыл паддзахадон университеты ЮНЕСКО-йы залы ацыд ахуыргæнджыты кусæн бынæтты равдыст. Архайдтой дзы регионы ахуырадон уагдæтты минæвæрттæ æмæ педагогон ахуырад исæг студенттæ.
Ярмаркæмæ æрбацыдысты 200 студентæй фылдæр – ЦИПУ, ХМИ, ХПАУ æмæ ЦИПК-æй. Фидæны ахуыргæнджытæн бацамыдтой 170 кусæн бынаты бæрц Цæгат Ирыстоны районты алы скъолатæ æмæ ахуыргæнæндæттæй, Мæздæджы, Кировы, Æрыдоны, Рахизфарсы, Дыгуры, Æрæфы, Алагиры æмæ Горæтгæрон районтæй. Ярмаркæйы архайджытæн раарфæ кодта ЦИПУ-йы ректор Огъуаты Алан æмæ РЦИ-Аланийы ахуырад æмæ наукæйы министры хæдивæг Андрей Швецов. Уый фæнысан кодта фæсивæды педагогон куыстмæ профессионалон здæхты ахсджиагдзинад æмæ æркастысты республикæйы ахуырадон системæйы райрæзты гæнæнтæм.
«Мæн уырны, ахуыргæнæджы бынат не ‘хсæнады бæрзонд къæпхæныл кæй ис. Нæ бæстæйы, нæ республикæйы алы цæрæджы хъомылад баст у скъолаимæ, комкоммæ ахуыргæнæгимæ. Æмæ нæ тынг фæнды, нæ унивеситеты цæмæй хъомыл кæнæм фæсивæдæн сæ куыст чи бауарзын кæндзæн æмæ сæхи куыстыл дæр æнувыд æмæ зæрдæргъæвд чи у, ахæм ахуыргæнджытæ æмæ педагогтæ», – загъта Огъуаты Алан.
Ярмаркæйы рæстæг ацыд ЦИПУ-йы профориентацион проект «Учитель: история успеха»-йы презентаци дæр. Сæ куыст равдыстой ахуыргæнæджы дæсныйад чи равзæрста, ЦИПУ-йы уыцы рауагъдонтæ: 25-æм скъолайы директоры хæстæ æххæстгæнæг Дриаты Марат, республикон конкурс «Педагог года – 2025»-ы лауреат, Беслæны 5-æм скъолайы физикæйы ахуыргæнæг Лазарты Арсен, ЦИПУ-йы педагогон ахуырады кафедрæйы ассистент Тотойты Бэлæ, 28-æм скъолайы истори æмæ æхсæнадон зонады ахуыргæнæг Егор Тихонов, Архонкæйы Советон Цæдисы Хъайтар В.Д.Коняхины номыл 2-æм скъолайы фæсарæйнаг æвзаджы ахуыргæнæг, республикон конкурс «Педагог года – 2025»-йы призер Хамихъоти Айзæ.
Презентаци ацыд TED Talks-ы хуызы – ахуыргæнджытæм лæвæрдтой фæрстытæ æмæ сыл хъуыди дзуапп раттын цыбыр разæнгардгæнæн ныхасæй. Афтæ, кусæн бынæтты равдыстмæ фæхуынд эксперттæ радзырдтой архайджытæн ахуыргæнæгмæ хъуамæ цавæр миниуджытæ уа æмæ цавæр зындзинæдтыл у йæ бон сæмбæлын. Сæ раныхасы кæрон æрыгон ахуыргæнджытæн дзырдой сæхи дæнцæгтæй, алы уавæрты хи куыд дарын хъæуы, уый фæдыл.
Радзырдтой ма, æрыгон ахуыргæнджытæн скъолаты куысты уавæрты тыххæй. Уæлдайдæр, мызд сын куыд нысангонд цæуы æмæ сын цы федералон æмæ муниципалон æххуыс цæуы, уый фæдыл, зæгъæм, программæ «Земский учитель».
ЦИПУ-йы ахуыргæнæджы кусæн бынæтты равдыст цæуы æртыккаг хатт. Мадзал сарæзта республикæйы ахуырад æмæ наукæйы Министрад, Цæгат Ирыстоны паддзахадон университет æмæ Цæгат Ирыстоны паддзахадон колледж.
Более 200 будущих педагогов посетили ярмарку педагогических вакансий в СОГУ