Цæгат Ирыстоны Хетæгкаты Къостайы номыл паддзахадон университеты скусын кæндзысты фабрикæ-цæлгæнæн сæрмагонд хæстон операцийы архайджытæн хæринаджы продукттæ уадзынæн. Проект æхцайы фæрæзтæй ифтонг кæндзæн цытджын сгарæг инæлар-булкъон Мамсыраты Хаджи-Умары хъæбулы хъæбул Серхио Эрнандес.
Рауагъдад цæудзæн университеты хими, биологи æмæ биотехнологийы факультеты хæринаджы продуктты технологийы кафедрæйы бындурыл. Дыккаг аз ахуыргæнджытæ æмæ студентты æххуысæй кафедрæ уадзы æмæ фронтмæ æрвиты хус хъæрмхуыппытæ æмæ кас.
Серхио Эрнандесы бавæрæн æххуыс уыдзæн рауагъд хæлцы бæрц фæфылдæр кæнынæн. Проект сæххæст кæнынæн университет сифтонг кæндзысты хъæугæ кусæн дзаумæттæй, уыдоны хыгъд автоклавтæ, дегидратортæ, уазалгæнæн скъæппытæ, индукцион пецтæ, сæлын кæнæн æмæ æндæртæ.
Сарæзт æххуысы фæрцы сæрмагонд хæринæгтæ фæфылдæр уыдзысты, уагъд цæудзысты реторт-дзæкъулты, дзидзайæ, дыргътæй хæлц, дыргъты хустæ æмæ æхсæртæ.
«Хæринаджы продуктты технологийы кафедрæ сæрмагонд хæстон операцийы фыццаг бонтæй æххуыс кодта нæ хæстонтæн. Ахуыргæнджытæ æмæ студенттæ сарæзтой гуманитарон æххуысы хуызы фронтмæ цымыдисаг хæринæгтæ. Ныр нын Серхиойы фæрцы уыдзæн фадат нæ рауагъдон тых фæуæрæхдæр кæнынæн. Уырны мæ, нæ студенттæн дæр кæй уыдзæн сæ лабораторон æмæ куыстадон практикæтæ ацæуынæн иттæг хорз фæзуат. Уымæй уæлдай, уыдзæн уæлæмхасæн фадат нæ хæстонтæн феххуысæн дæр», – загъта Огъуаты Алан.
Ректор Огъуаты Алан Серхио Эрнандесимæ иумæ æркастысты, рауагъдад кæм цæудзæн, уыцы бæстыхæйттæм. Мамсыраты мыггаджы минæвар разыйæ баззад, вазыгджын социалон проекты сæххæстмæ университеты цæттæдзинад фæнысан кæнгæйæ.
СОГУ и внук полковника Ксанти запустят питание для бойцов СВО