Пятигорскы «ТАСС.Кавказ»ы пресс-центры ацыд пресс конференци. Архайдтой дзы Цæгат Ирыстоны Хетæгкаты Къостайы номыл паддзахадон университеты уырыссаг филологийы декан Толасти Иринæ æмæ историон факультеты декан Плиты Зæлинæ. Уыдон дзырдтой Ираны Республикæйы уырыссаг æвзаг парахат кæныны гæнæнтæн нысангонд æхсæнадæмон наукон-практикон конференцийы фæдыл.
Æхсæнадæмон конференци «Исследование проблем и перспектив распространения русского языка, русской литературы и культуры в Исламской Республике Иран» ацæудзæн Джеоргуыбайы мæйы 13-16 бонты ЦИПУ-йы фонд «Русский мир»-ы æххуысæй. Нысангонд цæудзæн Ираны студенттæн уырыссаг взаг, литературæ æмæ культурæ амоныны актуалон фæрстытæн æмæ Уæрæсе æмæ Ираны ‘хсæн гуманитарон æмгуыстады райрæзтæн.
Спикертæ куыд фæнысан кодтой, форумы сарæзтæн феххуыс сты ЦИПУ-йы дæргъвæтин рæстæг наукон æмæ культурон æмахастытæ Ираны университеттæ æмæ наукон центртимæ. Тегераны университет Алламе Табатабаиимæ ЦИПУ бирæ азты æнтыстджынæй кусы: ис сын иумæйаг наукон æмæ культурон проекттæ, ахуырадон программæтæ æмæ студенттæй академион баивд, стажировкæтæ, конференцитæ æмæ æрбадтытæ.
Æмгуыстыл дзургæйæ Плиты Зæлинæ фæнысан кодта, 2027 азмæ кæй цæттæ кæнынц иумæйаг монографи персайнаг делегацийы историйы тыххæй Цæгат Кавказы.
«Ирыстон æмæ Ираны æнгом æмгуыст фадат ратда нæ историйы астæуккаг æнустæм ног сыф багом кæнынæн. Нæ ахуыргæндты æмархайды фæрцы бакуыстам бирæ документтыл. Æртæккæ сыл цæттæ кæнæм монографи», – фæбæрæг кодта Плиты Зæлинæ.
Фидæны конференцийы рæгъмæ рахæсдзысты, уæрæсейаг æмæ ирайнаг уæлдæр ахуырадон æмæ наукон уагдæтты Ираны уырыссаг æвзаг, литературæ æмæ культурæ парахат кæныны фæдыл сæ фæлтæрд æмæ иртасæн куыстыты хатдзæгтæ.
Толасти Иринæ куыд загъта, афтæмæй форумы архайдзысты 50 ахуыргондæй фылдæр, сæ докладтæ бакæсдзысты æртæ тематикон секцийы. Æркæсдзысты уырыссаг-ирайнаг æвзагон æмæ культурон æмахастытæм, ирайнаг ахуыргæнинæгтæн уырыссаг æвзаг амоныны нырыккон методикæтæм. Архайджыты ‘хсæн лингвисттæ, литературæ иртасджытæ, политологтæ, историктæ æмæ методисттæ Санкт-Петербург, Казань, Уфа, Стъарапол, Дзæуджыхъæу æмæ Ираны Республикæйæ. Конференцийы кадджын уазджытæ уыдзысты Республикæ Ираны уæлрадон æмæ æххæстбарджын минæвар Уæрæсейы Федерацийы Казем Джалали, Уæрæсейы Ираны минæварады наукæ æмæ ахуырады фæрстытæй сæйраг уынаффæгæнæг Али Мохагег, Алламе Табатабаийы номыл университеты президент Шоджа Ахмадванд.
Наукæйæ уæлдай архайджытæн равдисдзысты культурон программæ дæр: уазджытæ базонгæ уыдзысты Цæгат Ирыстоны истори æмæ культурæимæ, бабæрæг кæндзысты Дзæуджыхъæуы культурон центртæ æмæ зæрдылдарæн бынæттæ.
«Фæстаг азты цаутæм куы æркæсæм, уæддæр уырыссаг æвзагмæ ис тынг бæрзонд цымыдисдзинад – Скæсæны дæр æмæ Ныгуылæны дæр. Уырыссаг æвзаг, литературæ æмæ культурæ чи ахуыр кæны, уыдон се ‘ппæт бацыдысты фонд «Русский мир»-ы орбитæмæ, æмæ мах стæм уыцы тыгъдады хай. Не ‘мгуыстгæнджытæй фæсарæнты мах зонæм, Уæрæсемæ, йæ культурон бынтæм цымыдисдзинад фыццагау бæрзонд кæй у. Махæн та нæ хæс у, уыцы цымыдисдзинад ма бауадзын фесафын, уымæн феххуыс уыдзæн ацы конференци дæр», – загъта ЦИПУ-йы уырыссаг филологийы факультеты декан Толасти Иринæ.
На «ТАСС.Кавказ» представили международную конференцию СОГУ о продвижении русского языка в Иране