Цæгат Ирыстоны Хетæгкаты Къостайы номыл университеты йæ куыст райдыдта советон экономист, экономикон наукæты доктор, Мæскуыйы паддзахадон университеты профессор Цæголты Никъалайы 120 азмæ арæзт Дзыуджыхъæуы III экономикон форум.
Форумы куыст цæуы тематикон секцитæ æмæ тымбыл стъолты арæнты, ныхас дзы цæуы Цæголты Никъалайы наукон бавæрæнты фарстатыл, регионалон экономикон политикæйы нырыккон уавæртыл, экономикон сферæйы кадрты цæттæдзинадыл.
Форум байгом пленарон æрбадтæй, хайад дзы истой республикæйы хицауады минæвæрттæ, уырыссаг æмæ фæсарæйнаг ахуыргæндтæ-экономисттæ, паддзахадон структурæтæ æмæ æхсæнады минæвæрттæ, республикæйы бизнес-æхсæнад æмæ Уæрæсейы Федерацийы æндæр субъекттæ.
ЦИПУ-йы ректоры номæй форумы уазджытæн арфæйы ныхæстæ загъта университеты наукон куысты проректор Тенгиз Тиникашвили. Уый фæнысан кодта, Цæголты Никъалайы наукон сфæлдыстад ныр дæр кæй у вазыгджын æмæ домгæ уæлдæр скъолайы экономисттæ цæттæ кæныны.
Пленарон æрбадты кадджын уазджытæ уыдысты ахуыргонды бинонты уæнгтæ, уыдонимæ Цæголты Никъалайæн йæ фырты фырт, экономист, М.В. Ломоносовы номыл МГУ-йы экономикон факультеты рауагъдон – Цæголты Алыксандр.
«Махæн уæлдай ахсджиаг у, Никъала æмæ йæ бынтæ æрмæст Уæрæсейы экономикон зондысконды æмæ Цæгат Ирыстоны азгайфысты сызгъæрин нæмтты ‘хсæн стыр дамгъæтæй фыст кæй не сты, фæлæ сæ кой кæй цæуы æрвылбон, нымад цæуынц абоны экономикон проблемæтыл дзургæйæ. Æмæ кæд рæстæджытæ ивынц, уæддæр Никъалайы сгуыхтдзинад педагогикæйы сæрмагонд у. Уый студентты æрмæг æнæ бамбаргæйæ тыхахуыр кæнын нæ кодта. Уый сæ ахуыр кодта логикон æгъдауæй хъуыды кæнын, сæрмагонд хицæн кæнын фæрссагæй. Уый хуымæтæг ахуыргæнæг нæ уыд, уымæн йæ бон уыд студентты цымыдисы бафтауын, скусын сæ кæнын, цæмæй ма тæрсой сæ хъуыдытæ ирдæй æвдисын»- загъта Цæголты Алыксандр.
Æрбадт ахæццæ кодтой докладтæм байхъуыстæй. Сæ мидис уыд Цæголты Никъалайы куыстыты бынат нырыккон экономикон наукæ æмæ ахуырады, Цæгат Ирыстоны социалон-экономикон райрæзты дардмæ акаст, æддагон-экономикон архайдмæ цæстæнгас.
Тематикон секциты куыст дарддæр цæудзæн 10 декабры ЦИПУ-йы. Секцитæй иу йæ куыст кæндзæн Цæголты Никъалайы райгуырæн горæт Дигорайы, ахуыргонды номыл Историон-мемориалон Хæдзар-музейы.
