ЦИПУ-йы ректораты залы РЦИ-Аланийы сæргълæууæг Сергей Меняйло фембæлд республикæйы истори æмæ археологийы институты директор Бзарты Руслан разамынд кæмæн кæны, уыцы ахуыргæнæн чиныг саразджыты къордимæ.
Фембæлды æрдзырдтой иумæйагахуырадон скъолаты 5-7-æм кълæстæн райгуырæн бæстæйы историйæ ахуыргæнæн чингуытæ бацæттæ кæныны æмæ Республикæ Цæгат Ирыстон-Аланийы историйы зынгæ фæд чи ныууагъта, уыцы зындгон адæмы тыххæй мыхуырмæ чиныг бацæттæ кæныны фæдыл.
Фембæлды архайдтой ЦИПУ-йы ректор Огъуаты Алан, РЦИ-Аланийы наукæ æмæ ахуырады министр Элла Алибекова, РЦИ-Аланийы Хицауады сæрдары хæдивæг Платы Альбинæ, авторты къорды разамонæг, республикæйы истори æмæ археологийы институты директор Бзарты Руслан, стæй, редакцион къамисы уæнгтæ.
Бзарты Руслан равдыста ахуыргæнæн чингуыты макет. Йæ ныхасмæ гæсгæ макет раздæр æвдыст æрцыд Уæрæсейы Хæстон – историон æхсæнады конференцийы. Уыцы конференцийы уыдысты сыхаг республикæты минæвæрттæ Мæхъæл æмæ Хъæрæсе-Черкесæй. Уыдис сæм разыйы цæстæнгас. Уымæй уæлдай, чиныг æнтыстджынæй ацыд экспертизæйы æртæ этапы федералон æмвæзадыл. Иннæ этап та – Уæрæсейы наукæты академийы экспертизæ.
Афтæ, æмбырды æрныхас кодтой Цæгат Ирыстоны зынгæ фæд чи ныууагъта, уыцы зындгонд адæмыл чиныг саразыны фæдыл куыст куыд цæудзæн, ууыл дæр. Чиныг хъуамæ цæттæ уа Ирыстоны Уæрæсемæ баиуы 250 азмæ. Чиныг араздзысты ахуырад æмæ наукæйы Министрад Цæгат Ирыстоны истори æмæ археологийы институтимæ иумæ. Чиныг бацæттæ кæныны кыустыл ма бафтаудзысты ЦИПУ-йы историон факультеты студентты дæр.