Цæгат Ирыстоны Хетæгкаты Къостайы номыл паддзахадон университеты ЮНЕСКО-йы залы ацыд фæсивæдон политикæйы куыст æмæ йæ перспективæты фæдыл конференци. Архайдтой дзы университеты хицауад æмæ студентты профсоюзон организацийы уæнгтæ æмæ минæвæрттæ.

Ректор Огъуаты Алан йæ раныхасы бацамыдта социалон политикæ æмæ фæсивæдимæ куысты ног проректор Кокайты Аланы, æмæ раарфæ кодта Фæрниаты Елизаветæйæн, студентты профсоюзон организацийы сæрдарæй йæ кæй равзæрстой, уый фæдыл.

Ректор фæнысан кодта, университеты размæцыд иумæйаг куыстæй аразгæ кæй у æмæ уыцы куысты зынгæ бынат кæй ахсынц студенттæ дæр.

«Студентты ‘рдыгæй алы цæстæнгас дæр, алы хъæппæрис дæр махæн тынг ахсджиаг сты, цæмæй æмбарæм, нæ куыст семæ куыд аразæм, нæ хъус фылдæр цæмæ дарæм, уый. Уымæ гæсгæ, абоны конференицийы ректорат æмæ адмистрацийы ‘ргом сæйрагдæр сымахмæ здæхт у, алы фарсты равзæрст æрмæст уыдонæй арæзт хъуамæ ма уа. Хъуамæ хынцæм сымах цæстæнгас дæр. Ис нын уемæ æргом ныхас кæныны фадат. Кæрæдзимæ хъуамæ хъусæм, иувас кæнæм хъæндзинæдтæ, фидæны уавæр цæмæй уа хуыздæр», – загъта Огъуаты Алан.

ЦИПУ-йы студентты профсоюзон организацийы пъланы тыххæй радзырдта Фæрниаты Елизаветæ. Фехъусын кодта, профсоюзы дæсныйад цæмæ здæх у, уый –  сæйрагдæр, студентты ахуыр, æмдзæрæны æмæ æвдæлон рæстæджы уавæр фæхуыздæр кæнынмæ, сæ бартæ бахъахъхъæнынмæ æмæ сын сæ интерестæ эффективонæй равдисынмæ баххуыс кæнынæн.

Конференцийы ма æрдзырдтой старостаты куысты фæдыл дæр, бахастой фæндон университеты мидæг студентон совет æмæ фæсивæдон политикæйы совет саразынæн. Уый хыгъд, равдыстой республикæйы студентон организацийы сарæзты концепци, кæцыйы фæрцы алы уæлдæр ахуырадон уагдæтты студенттæн уыдзæн фадат кæрæдзиимæ алы сферæты кусын.

Уымæй уæлдай ма конференцийы дзырдтой уæлдæр ахуырадон уагдæтты медиатыгъдады райрæзтыл – уагдæтты æмархайд саразыныл бакусын, университеты цард равдисынæн хæрзхъæд информаци æрæмбырд кæнгæйæ.

 

В СОГУ обсудили стратегии развития молодежной политики вуза