Цæгат Ирыстоны Хетæгкаты Къостайы номыл паддзахадон университеты бындурыл арæзт æрцыд Хъырымы В.И.Вернадскийы номыл федералон университетимæ иумæйаг диссертацион совет филологон наукæтæ иртасыны ахуыргонд къæпхæн райсынæн.
Диссертацион советы бар уыдзæн дæсныйад «Теоретикон, практикон, абарстон-æрæмных лингвистикæ»-æй бахъахъхъæнын диссертацитæ кандидатон æмæ докторон наукæты къæпхæн райсынæн. Диссертацион советы сæрдариуæг кæны филологон наукæты доктор, ЦИПУ-йы профессор Татьяна Тамерьян.
Советы уæнгтæ сты дыууæ сæрмагонд уæлдæр ахуырадон уагдоны филологон наукæты доктортæ, Хуссар æмæ Цæгат-Кавказаг федералон зылдты университетты профессортæ.
«Диссертацион советы байгом – æрмæст стыр æнтыст нæу, фæлæ ма у ЦИПУ-йы æнтыстджын куысты æвдисæн дæр. Ныр 10 азы дæргъы нæ аспиранттæ, докторанттæ, æмæ наукæ иртасджытæн сæ бон нæ уыд сæ куыстытæ бахъахъхъæнын нæхи университеты. Иугонд диссертацион советы куыст æххуыс уыдзæн филологийы къабазы наукон иртæстыты парахатæн, дыууæ университетæн байгом уыдзысты æмкуыст кæнынæн гæнæнтæ. Уый ахъаз уыдзæн стратегион хæстæ хынцынæн, фундаменталон æмæ сæ практикон æххæсты цыдæн, наукон скъолаты рæзтæн, паддзахадон наукон аттестацийы объективон æркастæн, наукон æмæ наукон-педагогон кадртæ бацæттæ кæнынæн», – загъта Татьяна Тамерьян.