Уæрæсейы студенты бон Цæгат Ирыстоны паддзахадон университеты схорзæхджын кодтой хуыздæр студентты æмæ Фыдыбæстæйы Стых Хæсты цытæн сарæзтой интеллектуалон викторинæ.

Студенттæн арфæйы ныхасæй байгом кодта фембæлд ЦИПУ-йы ректор Огъуаты Алан.

 «Ацы бон у тынг ахсджиаг студенттæн, ахуыргæнджытæн æмæ ныййарджытæн. Махæн у уæлдай æхсызгон фадат нæ студентты æнтыстдзинæдтыл дзурынмæ. Мах уæ алкæмæй дæр сæрыстыр стæм, уæ ахуырмæ ахæм зæрдæргъæвд цæстæнгас кæй дарут, университет æмæ республикæйæн  ахæм кад кæй кæнут, уымæй. Уе сгуыхтдзинæдтæ дзурæг сты ууыл, æмæ алы студентæн дæр абон ис фадат йæ талант  раргом кæнынæн. Æмæ уын мæ зæрдæ зæгъы, цæмæй уæ алкæмæн дæр бантыса йæ фæндон ссæххæст кæнын. Кад кæнут наукæтæн, уарзут аивад! Тырнут размæ, уæ бæллицтæм!», загъта Огъуаты Алан.

Хуыздæр студентты сæ хорз ахуыры тыххæй, сæ наукон-иртасæн куысты тыххæй, университеты æхсæнадон царды æнтыстджынæй хайад кæй исынц, уый тыххæй схорзæхджын кодтой кады гæххæттытæй. Арфæйы фыстæджытæ студенттæн радтой республикæйы сæргълæууæг Сергей Меняйло æмæ РЦИ-Аланийы Росгвардийы Управленийы хицау Валерий Голота. 19 студентæн хæрзиуджытæ се ‘нтыстдзинады тыххæй балæвар кодта ректор Огъуаты Алан дæр.

Студенты боны сæйраг мадзал уыдис Фыдыбæстæйы Стыр Хæсты намысæн арæзт интеллектуалон викторинæ «Мозговой штурм». Викторинæйы архайдтой 12 командæйы университеты студенттæ æмæ ахуыргæнджытæй. Иумæ дзуапп лæвæрдтой Фыдыбæстæйы Стыр Хæсты, уæлдай дæр Кавказы, цауты фæрстытæн.

Викторинæйы фыццаг бынат бацахста командæ «Мах – фыццæгтæ», йæ кадджын уазæг уыд республикæйы сæргълæууæг Сергей Меняйло. Дыккаг бынат бацахста командæ «Уæлахиз», архайдта дзы Æппæтуæрæсейон регионалон исполкомы æхсæнадон змæлд «Народный фронт»-ы разамонæг Гæлиты Клим. Æртыккаг бынат бацахста командæ «Клио», уым та студенттимæ архайдтой ЦИПУ-йы ректор Огъуаты Алан æмæ ЦИПУ-йы ахуыры хайады проректор Зæгæлты Зæлинæ.

Цæмæй æрыгон фæлтæр патриотизмыл хъомыл кæной æмæ  ахæм историон цаутæ ма рох кæной, уый фæдыл арæзт мадзæлттæй викторинæ у фыццаг.

 

«Мы гордимся каждым студентом!»: в СОГУ отметили День российского студенчества