ЦИПУ-йы хими, биологи æмæ биотехнологийы факультеты ахуыргæндтæ се ‘мгуыстгæнджытæн Г.В. Плехановы номыл Уæрæсейы экономикон университетæй радзырдтой хъæрмхуыпп тагъд саразынæн хус хъацæнтæ цæттæ кæныны фæлтæрддзинады тыххæй. Уыдон ныр афæдзæй фылдæр æрвыст цæуынц æфсæддонтæн сæрмагонд хæстон операцимæ.
Цæгæраты Еленæ, биологон наукæты кандидат, хæринаджы продуктты технологийы кафедрæйы доцент, наукон-практикон семинары рацыд йæ докладимæ, уый радзырдта кафæдрæйы равзæрды тыххæй, цавæр актуалон цæттæдзинад у райсын сæ бон студенттæн æмæ сæ зонындзинæдтæ практикон æгъдауæй куыд равдисой, уый фæдыл. Фæнысан кодта сæрмагонд наукон инновацион биотехнологиты райрæзтытæ зайæгой æмæ цæрæгой хомагæй. Доклады бæстон цæстдард æрцыд тагъд аразгæ хус хъæрмхуыппытæм, аразынц сæ кафедрæйы ахуыргæнджытæ æмæ студенттæ æнæ консерванттæ æмæ химийæ дæргъвæтин нæ хæлыны æмгъуыдимæ.
Докладмæ хъусджытæм цымыдисаг фæкаст йæ мидис. Райрæзтæн патент ис, уæй кæнæны бар ын ис, хъæрмхуыппытæн ис æппынæдзух уадзыны фадат – ахæм фæрстытæ лæвæрдтой ахуыргæнæгмæ.
«Куыд рабæрæг, продуктты дæргъвæтин рæстæг нæ хæлыны æмгъуыды темæ нæ бæстæйы цæрджытæн у актуалон. Бирæтæн ис сæхи цæхæрадæттæ, зайын кæнынц халсартæ, цæмæй сæ зымæгмæ бавæрой. Уымæ гæсгæ фарстой, мах технологитæм гæсгæ халсартæн ис сæ ма фехæлыны æмгъуыд фæдаргъдæр кæнæн, цæхджын кæныны бæсты, зæгъгæ», – загъта Цæгæраты Еленæ.
Г.В. Плехановы номыл Уæрæсейы экономикон университеты товарон экспертизæ æмæ Уæлдæр инженерон скъолайы таможняйы хъуыддаджы кафедрæйы наукон-практикон семинар «Новые материалы и технологии» арæзт æрцыд наукон-техникон прогрессы актуалон фарстаты фæдыл. Уæрæсейы университеттæ дзы рæгъмæ рахæссынц сæхи иртасæнтæ æмæ ныхас кæнынц сæ фæлтæрддзинадыл.