Æппæтдунеон сылгоймæгты боны агъоммæ ЦИПУ-йы ректор Огъуаты Алан фембæлд университеты кусæг сылгоймæгтимæ, сæ хиуæттæ ныртæккæ Сæрмагонд хæстон операцийы кæмæн сты, уыдонимæ.
Огъуаты Алан фæбæрæг кодта, зын рæстæг университет хъуамæ кæй уа, алы кусæг дæр йæхи уарзæг æмæ кæрæдзиуыл æнувыд бинонты ‘хсæн кæм банкъара, ахæм бынат.
«Ис ахæм професси – Райгуырæн бæстæ хъахъхъæнын. Сымахæн уæ бинойнæгтæ, уæ сывæллæттæ, уе ‘фсымæртæ æмæ уæ ныййарджытæ равзæрстой уыцы фæндаг. Æнæмæнг, махæн у стыр трагеди, цалынмæ æрвылбон мах сывæллæтты фæахуыр кæнæм, нæ царды куыст фæкæнæм, нæ нæлгоймæгтæ та уыцы рæстæг тох фæкæнынц раззагдæрты æмрæнхъ, цæфтæ баййафынц, фæмард вæййынц. Ахæм зындзинад уæ кæуыл æрцыд, уыдонæн зæрдæбынæй тæфæрфæс кæнын. Ам, университеты, мах стæм иу бинонтæ. Мах хъуамæ иумæ нæ циныл цин бакæнæм, нæ зындзинадыл та иумæ фæхъыг кæнæм. Зæгъын уын стыр бузныг», – загъта ректор.
Сылгоймæгтæн ма раарфæ кодтой наукон архайды проректор Тенгиз Тиникашвили æмæ æдасдзинады проректор Лохаты Азæмæт.
Бузныджы ныхас загъта ЦИПУ-йы Наукон библиотекæйы кусæг Кокайты Кларæ. Йæ лæппу 2022 азы тæргæйтты мæйæ нырмæ нæ бæстæйы сæраппонд тох кæны Сæрмагонд æфсæддон операцийы.
«Цы бон базыдта Алан, мæ лæппу Сæрмагонд æфсæддон операцимæ ацыд, уæдæй æртæ азы дæргъы æппынæдзух мæ фæфæрсы мæ лæппуйы хабæрттæй. Бузныг, Алан, дæ ныййарджытæн, ахæм сывæллон чи схъомыл кодта. Мæ зæрдæ дын зæгъы æнæниздзинад æмæ дын арфæ кæнын, махмæ ахæм зæрдæ кæй дарыс, уый фæдыл», – загъта Кокайты Кларæ.
Фембæлды фæстæ Огъуаты Алан бабæрæг кодта ЦИПУ-йы историон факультеты хистæр ахуыргæнæг Бимбасов Русланы мад Натальяйы. Руслан ныртæккæ ис Сæрмагонд æфсæддон операцийы.
«Дæ лæппу абон кæд дæуæй дард ис, уæддæр стыр хъуыддаг кæны – Фыдыбæстæ хъахъхъæны. Æмæ цалынмæ Руслан ам нæй, уæдмæ нæ фæнды дæ фарсмæ æрбалæууын, дæ зындзинæдтæм нæ хъус æрдарын æмæ дын баххуыс кæнын. Уыдон стыр ныхæстæ не сты. Æцæгдæр цæуынц зæрдæйæ. Кæдфæнды дæр цыфæнды фарстайы фæдыл дæр баххуыс кæндзыстæм. Арфæ дын кæным Æппæтдунеон сылгоймæгты бæрæгбоны фæдыл. Ды схъомыл кодтай æцæг патриот, нымад адæймаг æмæ дын бузныг зæгъæм» – загъта Алан.
Наталья раарфæ кодта ректорæн, кæй йæ бабæрæг кодтой уый фæдыл. Уæлдай бузныг та уыди, университет æфсæддонтæн цы æххуыс æрвиты, уымæй.
«Зонын, сымах æххуыс кæнут фæсивæдæн, уый тынг ахсджиаг у. Бузныг уе ‘рхъуыдыйæ», – загъта Наталья.
Бæрæгбоны фæдыл раарфæ кодтой физикон-технологион факультеты ахуыргæнæг, техникон наукæты кандидат Уырымты Владимиры мадæн дæр. Владимир æртæккæ ис цыбыр отпускы республикæйы. 2022 азæй ис Сæрмагонд æфсæддон операцийы.
«Мы вместе!»: Алан Огоев поздравил с 8 марта сотрудниц СОГУ — матерей, жен и дочерей героев СВО
