Цæгат Ирыстоны Хетæгкаты Къостайы номыл паддзахадон университеты райдыдта цæуын æрвылазон акци «Наукæйы бонтæ». Дыууæ боны дæргъы, хуымгæнæны 23 æмæ 24 бонты, университеты 15 факультеты равдисдзысты сæ наукон-популярон æмæ рухсадон мадзæлтты программæтæ.
Мадзал кадджын уавæры байгомы хайад истой республикæйы ахуырады министры хæдивæг Габеты Вадим, Дзæуджыхъæуы администрацийы сæргълæууæджы хæдивæг Ходы Мæдинæ, РЦИ_Аланийы сæргълæууæджы цур æрыгон ахуыргæндтæ æмæ специалистты Советы сæрдар Добаты Алыксандр, РЦИ-Аланийы ВТБ банчы бизнесы райрæзты фæткдар директор Уруймагти Вадим. Уазджытæн æмæ студенттæн раарфæ кодта ЦИПУ-йы наукон архайды проректор Тенгиз Тиникашвили. Хорзæхджынгонд æрцыдысты 2024 азы студентты наукон-иртасæн куысты хатдзæгтæм гæсгæ уæлахиздзаутæ. Зæрдылдарæн грамотæтæ æмæ лæвæрттæ радтой цалдæр номинацимæ гæсгæ:
- Номинаци «Студентты наукон-иртасæн куыстаразæг хуыздæр кафедрæ»-йы æртыккаг бынат бацахстой медицинон факультеты фундаменталон медицинæйы кафедрæ æмæ хими, биологи æмæ биотехнологийы факультеты иумæйаг æмæ неорганикон химийы кафедрæйы уæнгтæ. Дыккаг бынат радтой экономика æмæ управленийы факультеты менеджмент, маркетинг æмæ туризмы кафедрæ æмæ экономикæйы кафедрæйы уæнгтæн. Фыццаг бынат бацахстой экономикæ æмæ управленийы факультеты финанстæ, бухгалтерон хыгъд æмæ хъалонæвæрынады кафедрæ.
- Номинаци «Наукон-иртасæн архайды хатдзæгтæм гæсгæ хуыздæр студент»-ы æртыккаг бынат бацахстой фундаменталон медицинæйы 4 курсы студенттæ Тамара Чониашвили æмæ Кадиты Миланæ. Дыккаг бынат снысан кодтой экономикæ æмæ управленийы 3 курсы студенткæ Къуымæллæггаты Еленæйæн æмæ экономикæ æмæ управленийы 4-æм курс студент Цæрикъаты Маратæн. Фыццаг бынат бацахста экономикæ æмæ управленийы 3-æм курсы студенткæ Коцкиты Зарæ.
- Номинаци «Хуыздæр студентон наукон командæ»-йы æртыккаг бынат райста хими, биологи æмæ биотехнологийы факультеты командæ «Химиктæ-аналитиктæ» (Остаты Аланæ æмæ Хужокова Заринæ. Дыккаг бынат бацахстой экономикæ æмæ управленийы факультеты командæ «Коллективон зонд» (Зангионти Алинæ, Кокайты Зæлинæ æмæ Зæгæхты Аринæ. Ацы номинацийы уæлахиздзау сси географи æмæ геоэкологийы факультеты командæ «Геосинергия» (Дзантиаты Сæрмæт, Икъоты Валерия æмæ Дмитрий Радь.
Сæрмагонд лæвæрттæй схорзæхджын кодтой студентты мадзалы уазджытæ. Уруймагти Вадим дипломæй схорзæхджын кодта банк ВТБ-йы номæй 2024 азы финансон ахуырады конкурс «Финансты дуне»-йы уæлахиздзау æхсæнадæмон ахæстыты факультеты 4-æм курсы студенткæ Цæллати Камиллæйы. РЦИ-Аланийы æхсæнад «Зонад»-ы филиалы директор Гæбæраты Каринæ арфæйы гæххæтæй схорзæхджын кодта сæрмагонд номинаци «Хуыздæр студент – рухстауæг»-мæ гæсгæ историон факультеты 3-æм курсы студент Мырыкаты Артемийы.
ЦИПУ-йы арфæйы писмотæ радтой фундаменталон медицинæй кафедрæйы сæргълæууæг Цæрæхты Ларисæ æмæ фундаменталон медицинæйы кафедрæйы доцент Саламты Натальяйæн. Уыдон наукæйы активон зондамонæн архайд æмæ студентты стартапты сæххæсты, аргъ кæмæн нæй, ахæм æххуыс бакодтой.
Боны дæргъы университеты факультетты цыдысты након-популярон æмæ рухсадон мадзæлттæ: лекцитæ, мастер-класстæ, тренингтæ æмæ бирæ æндæртæ. Афтæ, физикон культурæ æмæ спорты факультеты ацыд мастер-класс адаптивон физкультур æмæ инновацион хуызы бацыд. Студенттæн сæ бацæттæ кодтой, сывæллæттæ æмæ кары адæмæй цæуын æмæ змæлынмæ зындзинад чи æййафы æмæ се ̓нæниздзинады гæнæнтæ къуындæг кæмæн сты, ахæм адæмимæ куысты специалисттæ: се ̓нæниздзинад къуындæг гæнæнтимæ кæмæн у, ахæм адæмимæ кусæг тренер-ахуыргæнæг физкультурæ æмæ спортæй Толова Валерия æмæ ЛФК, биомеханикæйæ, кинезеологийæ, краниосакральный терапийæ æмæ реабилитологийы специалист Хæтæгты Виталий.
Хими, биологи æмæ биотехнологийы факультеты ацыд мастер-класс «Ссады æнахуыр хуызтæй пайдакæнынад ссадæй конд хойраджы рауагъды». 48-æм скъолайы 11 къласы ахуырдзаутæн дзырдтой факультеты ахуыры тыххæй, наукон æмæ практикон куыстыл, ахуыргæнджытæ æмæ зындгонд рауагъдонтыл æмæ ахуыры рæстæг цы гæнæнтæ ис, уыдоныл. Уый фæстæ та хъусджытæ, студенттæ сæхæдæг цы хойраг бацæттæ кодтой, уыдонæй ацахыстой.
Юридикон факультеты ацыд хъазт «Судебный процесс». Скъоладзаутæ сæхи бафæлвæрдтой хъазты хуызы адæймаджы хи марынмæ æрцæуыны хуызы процессы æрбадты. Студенттæ равдыстой, тæрхон куыд фæцæуы, уазджытæн равдыстой, æцæгдæр тæрхоны æрбадтытæ куыд фæцæуынц, уый, стæй сæм чи кæсы, уыдонæн бар радтой, цæмæй сæхæдæг бамбарой, кæй фарс ис рæстдзинад.
Мадзал «Наукæйы бонтæ» архайджытæн дæтты фадат базонгæ уæвын наукæйы ногдæр æнтыстытимæ, фæлтæрд æмæ зонындзинæдтæ райсынмæ, ног проекттæ æмæ фæндтæй сразæнгард уæвынмæ.
