ЦИПУ-йы ирон филологийы факультеты 2-æм курсы студенттæ РЦИ-Аланийы Националон музеимæ иумæ сарæзтой ирон æвзагыл зонадон квест «Нæртон балц».
Квесты сæйраг нысан уыдис нарты героикон эпосмæ ‘ргом раздахын. Студенттæ бæстон æркастысты музейы экспозицитæм, рабæрæг дзы кодтой нарты кадджыты сюжетты чи ис, ахæм артефакттæ æмæ музейы залты сарæзтой маршрут. Квест арæзт уыдис музейы экспозицитыл балцы хуызы, хъуыдис сæххæст кæнын хæслæвæрдтæ æмæ нарты эпосы сюжеттæм гæсгæ ссарын предметтæ.
Студентты хъуыдыйы тыххæй загъта ЦИПУ-йы ирон филологийы факультеты декан Гуытъиаты Эльмирæ.
«Мæнмæ гæсгæ, тынг хорз хъуыды у, уымæн æмæ ацы рæсугъд æмæ уæлфæдзæхст бынаты тынг зæрдиагæй агурынц, цæмæй ссарай, уый тыххæй та хъæуы зонын. Кæд хъазты хуызы, уæддæр у ахсджиаг иртасæн. Мæн уырны студентты æмæ скъоладзауты зæрдæмæ тынг кæй фæцыд, кæй сразæнгард сты зонындзинæдтæм», – загъта Гуытъиаты Эльмирæ.
Проект арæзт æрцыд дисциплинæ «Обучение служением»-ы фæлгæтты. Йæ разамонæг ирон литературæйы кафедрæйы ассистент Æлборты Тамарæ. Квесты фыццаг архайджытæ уыдысты Дзусаты И.М. номыл 46-æм æмæ А.С. Пушкины номыл 7-æм скъолаты ахуырдзаутæ.
