ЦИПУ-йы журалистикæйы факультеты 2-æм курсы студенттæ бахъахъхъæдтой курсон проекттæ. Сæ нысан уыдис, сæрмагонд хæстон операцийы архайæг Цæгат Ирыстонæй рацæуæг Уæрæсейы хъайтарты ном ссарын.
Дисциплинæ «Управление проектами»-йы фæлгæтты студенттæ бацæттæ кодтой презентацитæ. Ацы дисциплинмæ гæсгæ ахуыр кæнынц проект бацæттæ кæныны алгоритмтæ æмæ архайынц сæхи проекттæ саразыныл.
ЦИПУ-йы ахуырадон куысты проректор Зæгæлты Зæлинæ æмæ журналистикæйы факультеты декан Хæбæлаты Фатимæ дæр зæрдиагæй байхъуыстой, студенттæ сæ проекттæ куыд хъахъхъæдтой, уымæ. Курсон куыстыты темæтæ снывонд кодтой Фыдыбæстæйы Стыр хæсты Уæлахизы 80 азы кадæн æмæ сæ проектты хъайтартæ уыдысты сæрмагонд хæстон операцийы Цæгат Ирыстонæй чи фесгуыхт, ахæм геройтæ.
«Ацы аз Фыдыбæстæйы Стыр хæсты Уæлахизыл 80 азы рацыд æмæ мах дæр бафæндыд нæ кадджын ивгъуыд нæ абонимæ баиу кæнын. Уымæ гæсгæ рахастам уынаффæ, нæ Райгуырæн зæхх сæрмагонд хæстон операцийы чи хъахъхъæны, Уæрæсейы уыцы хъайтарты тыххæй бацæттæ кæнын проекттæ. Мах студенттимæ дарддæр дæр кусдзыстæм уыцы проекттыл, чи зоны дзы грант дæр саразæм», – загъта Хæбæлаты Фатимæ.
Студентты презентациты хъайтартæ уыдысты Абайты Юрий, Гоов Альберт, Есенты Таймураз, Данилов Альберт, Стефанов Максим, Датиты Алан æмæ Тыбылты Марат. Радзырдтой сын сæ царды хабæртты æмæ хæстон фæндæгты тыххæй. Уымæй уæлдай ма, хъайтарты дæнцæгыл загътой сæ хъуыдытæ фæсивæды патриотон хъомылады фæдыл.
Проекттæ бахъахъхъæныны фæстæ бакастысты киноныв «Æнæмæлгæ полк. Ирæттæ – Советон цæдисы хъайтартæ». Бацæттæ йæ кодта патриотон клуб «Родина».
