Цæгат Ирыстоны Хетæгкаты Къостайы номыл паддзахадон университеты ирон филологийы факультет сарæзта профессионалон вебинар хъалмыхъаг æвзаджы райрæзты Центры кусджытæн. Студенттæ дзы рæгъмæ рахастой размæдзыд ахуырадон методикон амындтытæ.
Фембæлд саразыны разæнгардгæнджытæ уыдысты Центры кусджытæ. Уыдон регионты ‘хсæн мадæлон æвзаг амоныны пролемæты фæдыл конференцийы ЦИПУ-йы студентты наукон-иртасæн куыстытæн скодтой хорз аргъ.
Факультеты наукон-методикон лаборатори «Æрыгон ахуыргæнæг»-ы студенттæ сæ разамонæг педагогон наукæты кандидат, ирон æвзаджы кафедрæйы доцент Майрæмыхъуаты Фатимæимæ кусынц мадæлон æвзаджы методикæйы ногдзинæдтыл æмæ сæ æвдисынц куыд нæхи, афтæ иннæ республикæты ахуыргæнджытæн.
3-æм æмæ 5-æм курсыты студенттæн сæ фылдæр ныридæгæн кусынц скъолаты æмæ дзырдтой сæ наукон-иртасæн æмæ педагогон куысты цы хатдзæгтæ кæнынц æмæ цы фæлтæрддзинад исынц, ууыл. Æрыгон ахуыргæнджытæ равдыстой мадæлон æвзаг амоныны ног фæрæзтæ, нырыккон ног технологитæй пайда кæнгæйæ. Уыдоны фæрцы скъоладзаутæн сæ предметмæ цымыдисдзинад рæздзæн æмæ сæ зонындзинæдтæ дæр фæуæрæхдæр уыдзысты. Зæгъæм, цæстуынгæ æрмæджыты, карточкæты, интеллект-картæты, стикерты, литературон уацмыстæм касплейты хуызы.
Вебинары кæронбæттæны хъалмыхъаг æвзаджы райрæзты Центры кусджытæ фæбæрæг кодтой сарæзт мадзалы стыр пайда æмæ раарфæ кодтой ЦИПУ-йы студенттæ æмæ ахуыргæнджытæн Ирон æвзаг æмæ литературæйы боны фæдыл, цæмæй дарддæр дæр сæ наукон æмæ профессионалон куыст æнтыстджын уа.
Студенты СОГУ провели мастер-класс по преподаванию родного языка для педагогов Калмыкии