Цæгат Ирыстоны Хетæгкаты Къостайы номыл паддзахадон университеты студенттæ систы, ацы бонты Налцыччы чи ацыд, уыцы адæмон хъæзтыты æмæ националон спорты хуызтæ «Сила в единстве»-йы Цæгат-Кавказаг студентон фестивалы уæлахиздзаутæ æмæ призертæ.
Ерысты архайджытæ уыдысты мин адæймагæй фылдæр Цæгат-Кавказаг федералон зылды алы регионтæй, Луганскы æмæ Донецкы адæмон республикæтæй, Запорожье æмæ Херсоны областтæй.
Цæгат Ирыстоны номæй цы къорд ацыд, уым ЦИПУ-йæ уыдис 14 студенты. Университеты командæ равдыста иттæг хорз цæттæдзинад æмæ бацахстой къорд хæрзиуæг аккаг бынаты.
Бæрзонд æвдисæнтæ æмæ фыццаг бынат «Эстафетæ»-йы бацахстой Моргачев Эдуард, Билаонты Аринæ, Уæзæгты Вадим æмæ Бекъойты Александрæ.
«Борьба на поясах»-ы æвзист призертæ систы Бестауты Алан, Боцойты Марат æмæ Цæгæраты Æхсæртæг.
Дыккаг бынат канатыл хæрдмæ бырынæй бацахста Бтимирты Олег.
ЦИПУ-йы командæ бацахста дыккаг бынат бæндæн химæ ивазынæй æмæ равдыста къорды кæрæдзиуыл æнувыддзинад.
Масреслингæй дыккаг бынат бацахста Тохтиты Хетæг.
Уымæй уæлдай ма, спортæй архайджытæ сæхи рвдыстой гæпп кæныны ерысы хуызы æмæ фат æмæ æрдынæй æхсыны. Билаонты Аринæ бацахста дыккаг бынат гæпп кæнынæй, фатæй æхсæг Тменаты Хетæг та бацахста æртыккаг бынат.
Студенты СОГУ — победители и призеры межрегионального фестиваля народных игр