Хурхæтæны мæйы 30-æм бон ЦИПУ-йы концертон залы аивæдты факультеты театралон хайады студенттæ равдисдзысты рауагъдон спектакльтæ. Сæвæрдтой А.С.Пушкины уацмысмæ гæсгæ пластикон спектакль «Цыганы» æмæ ирон эпосы мотивтæм гæсгæ спектакль «Нарты Сослан».
Рауагъдон курсы режиссер-педагог у ЦИПУ-йы театралон дæсныйады кафедрæйы сæргълæууæг Æлбегаты Алан.
Пластикон спектакль «Цыганы» æвæрд æрцыд А.С. Пушкины поэмæмæ гæсгæ. Дзурæг у цигайнаг чызг Земфирæйы уарзтыл Алекомæ. Уый у уарзондзинад, зæрдæхсайд, бынæттон æмæ цæугæцардгæнæнг дунеты трагикон ныхмæлæуды истори. Йæ мидис ын студенттæ бацархайдзысты равдисын поэзи æмæ кафты хуызы. Спектаклы пластикæйыл архайдтой хареографтæ Гуцаты Тамерлан æмæ Хъуылаты Аланæ.
Спектакль «Нарты Сослан»-ы бындурæн та райстой Хъайттаты Сергейы пьесæ. Спектаклы æмдзу кæнынц традицион сюжеттæ æмæ нæ рæстæджы актуалон проблемæтæ. Режиссеры сæйраг хъуыды мистери саразыны мидæг ис, уый баиу кода рагон æгъдæуттæ æмæ эпосы метафорæтæ нырыккон æцæгдзинадимæ.
Зæгъын хъæуы уый, æмæ ацы студентты ахуырады хæрдзтæ райдианæй кæронмæ йæхимæ райста Хæдарцаты Махарбек. Йе ‘ххуысы фæрцы национ театры сценæйыл фæзындзæн ирон æвзаг иттæг хорз зонæг актертæ-профессионалты ног фæлтæр. Равдыст ацæудзæн хурхæтæны 30-æм бон 18.00 сахатыл ЦИПУ-йы Концертон залы.
Студенты-актеры СОГУ покажут выпускные спектакли на осетинском языке