ЮНЕСКО-йы залы лекци бакаст уæрæсейаг политолог Федор Лукьянов. Лекцимæ байхъусынмæ æрбацыдысты Цæгат Ирыстоны паддзахадон университеты ахуыргæнджытæ æмæ студенттæ.
Федор Лукьянов – НИУ «Экономикæйы уæлдæр скъола»-йы дунеон экономикæ æмæ дунеон политикæйы факультеты профессор-иртасæг, æддагон æмæ хъахъхъæнынады политикæйы советы Президиумы сæрдар, журнал «Уæрæсе глобалон политикæйы» сæйраг редактор, Æхсæнадæмон дискуссион клуб «Валдай»-ы директор, программæ «Æхсæнадæмон афæлгæст»-ы амонæг.
Лекцийы темæ уыдис «Фидæн æнæ сабырдзинадæй, сабырдзинад æнæ фидæнæй кæнæ фидæны сабырдзинад æппæт дунейы?». Нырыккон политикон уавæрты æхсæнадæмон системæйæн йæ бон куыд у аивын, глобализацийы темæ, æхсæнадæмон политикæйы политикон институтты бынат, Уæрæсейы архайды перспективæтæ æхсæнадæмон процессты – æппæт уыдæттыл дзырдта Федор йæ лекцийы.
«Уæрæсе у ахæм бæстæ, æппæтæй фылдæр кæй фæнды дунейы сабырдзинад. Æмбæлгæ полтикон уавæрты цыфæнды сæрмагонд дунеон процесстæ баст уыдзысты Уæрæсеимæ. Нæ тых фыццаджыдæр ис уый мидæг, æмæ нæ бон у нæхи рæзтыл кусын æмæ иннæ бæстæтимæ æмархайд кæнын. Мæ лекцийы мæ фæнды бамбарын кæнын, ныртæккæ цавæр политикон уавæрты цæрæм, не ‘ргом кæдæм здæхт у æмæ нæ бон кæцырдæм у цæуын, уый», – загъта Федор Лукьянов.
Лекцийы фæстæ Федор Лукьяновмæ фæрстытæ лæвæрдтой физикон-техникон факультеты декан Дауыраты Альбинæ, ирон филологийы факультеты декан Гуытъиаты Эльмирæ, æхсæнадæмон экономикон ахастыты кафедрæйы сæргълæууæг Цуциты Оксанæ æмæ ЦИПУ-йы студенттæ.
Фембæлды кæрон Федор Лукьяновæн ЦИПУ-йы ректор Огъуаты Алан скодта зæрдылдарæн лæвар æмæ раарфæ кодта уазæгæн йæ цымыдисаг лекцийы фæдыл.
