Цæгат Ирыстоны Хетæгкаты Къостайы номыл паддзахадон университеты ацыд Æппæтуæрæсеон студентон олимпиадæ «Я – профессионал» гом дуæртты Бон. ЦИПУ, ХПАУ æмæ ЦИПМА студенттæ базонгæ сты сарæзт проектимæ æмæ дзы архайыны гæнæты уавæртимæ.
Фембæлды уазджытæн раарфæ кодта ЦИПУ-йы ректор Огъуаты Алан.
«Махæн, наукæйы, ахуырады æмæ æрыгон специалистты карьерæйы райрæзтмæ здæхт университетæн, ахæм проекты архайын у тынг ахсджиаг хæс. Гом дуæртты Бон итæг хорз гæнæн у студенттæн сæ зонындзинæдты къæпхæн базонын. Махæн æхсызгон у ахæм егъау мадзалы архайын æмæ цæттæ стæм алы архайæгмæ дæр фæкæсын йæ профессионалон рæзт æмæ æнтысты фæндагыл», – загъта Огъуаты Алан.
Студентты Æппæтуæрæсеон олимпиадæ «Я – профессионал»-ы разамонæг Валерия Касамара байгом кодта олимпиадæйы IX-æм сезон æмæ радзырдта, архайджытæн сæ профессионалон рæзтæн цы гæнæнтæ фæзындзæн, уый тыххæй.
«Республикæ Цæгат Ирыстон акодта бæлвырд къахдзæф: амæй размæ сезоны 608 студенты æхсæз уæлдæр ахуырадон уагдонæй æмæ сæ филиалтæй архайдтой олимпиадæ «Я – профессионал»-ы æмæ дзы 12-æй райстой дипломтæ. Бындур æвæрд æрцыд. Ныртæккæ сæйрагдæр – хиуыл фылдæр кусын. Уырны мæ IX-æм сезоны Цæгат Ирыстон-Алани бæлвырд бæрзонд къæпхæныл кæй равдисдзæн йæхи, регионы курдиатджын фæсивæдæн уæрæх фæндаг байгом кæнгæйæ», – фæнысан кодта уый.
Гом дуæртты Боны фæлгæтты схорзæхджын кодтой дипломтæй VIII-æм сезоны олимпиадæйы архайджыты.
2024-2025 сезоны олимпиадæйы уæлахиздзау сси ЦИПУ-йы психологон-педагогон факультеты «Педагогон (скъолайы агъоммæ ) ахуыры хайады» 3-æм курсы студенткæ Ахмедова Лейлæ. Призертæ систы – æрдзон зонæдтæ æмæ технологиты факультеты 3-æм курсы студенткæ Суворова Анастасийæ, психологон-педагогон факультеты 3-æм курсы студенткæ Бушиева Софья, медицинон факультеты магистратурæйы студент Датиты Марат, æрдзон зонæдты æмæ технологиты факультеты студент Басаты Азæмæт. Афтæ, призертæ уыдысты ХПАУ-ы авд студенты дæр.
Дарддæр мадзалы программæ ахæццæ кодтой практикон хайæ, бацыдысты йæм карьерон активондзинад, куыстмæ бацæуыны рæстæг чи бахъæудзæн, ахæм фæлтæрддзинады райрæзт, карьерон квиз, уымæ гæсгæ сбæрæг кодтой архайджыты арф зонындзинæдтæ æмæ ахсджиаг куысты хуызтыл афæлгæст, афтæ ма хъазт «Групповое интервью» дæр, куыстмæ исыны уавæры хуызы.
Æппæтуæрæсеон олимпиадæ «Я – профессионал» арæзт цæуы 70 алыхуызон ахуырадон фæзилæнтæм гæсгæ: техникон, гуманитарон, æрдзон-зонадон, педагогон, аграрон æмæ медицинон. Уæлахиздзаутæ, призертæ æмæ диплом райсджытæн сæ бон у хуыздæр уæлдæр ахуырадон уагдæттæм цæугæйæ зæрдæ дарын æнцондæр бахауыны уавæртыл, уæрæсейаг компаниты стажировкæ кæныныл æмæ райсын æхцайы преми 100 мин сомæй 300 мин сомы онг.
Студентам Северной Осетии презентовали новый сезон олимпиады «Я — профессионал»