Цæгат Ирыстоны Хетæгкаты Къостайы номыл паддзахадон университеты ацыд университеты байгомæй 105 азæн нысангонд фыццаг Дзæуджыхъæуы фæсивæдон наукон форум.
Егъау наукон цау баиу кодта уæрæсейаг ахуыргæндты, паддзахадон структурæты, æхсæнады, Цæгат Ирыстоны бизнес-æхсæнады, ЦКФЗ æмæ Хуссар Ирыстоны æрыгон иртасджытæ æмæ студентты минæвæртты æрдзон æмæ гуманитарон наукæты нырыккон фæзилæнты актуалон фæрстытыл.
Форумы куыст здæх у æрыгон курдиæттæм фæкæсынмæ, фæлтæрддзинад æмæ информацийæ фæхай кæнынмæ, наукæйы парахатмæ, иртасæн куыст кæнын чи райдыдта, уыдоны профессионалон рæзтмæ хъус дарынмæ, æмхъуыды æхсæнад сырæзын кæнынмæ.
Форум арæзт æрцыд УФ ахуырад æмæ наукæйы Министрады гранты фæрцы, ЦИПУ-йæ рамбылдта студентон наукон иугæндтæм хъусдарды конкурсы. Университет бацыд æппæт Уæрæсейæ балæвæрд 316 курдиатæй хуыздæрты ‘хсæнмæ.
Мадзалы кадджын байгомы архайдтой РЦИ-Аланийы экономикон райрæзты министры фыццаг хæдивæг Олег Быкадоров, ахуырад æмæ наукæйы министры хæдивæг Габеты Вадим, бынæттон хицауады администрацийы сæргълæууæджы хæдивæг Ходы Мæдинæ, республикæйы Фæсивæдон парламенты сæрдар Куыдзиаты Азæмæт.
ЦИПУ-йы ректор Огъуаты Аланы номæй форумы уазджытæн раарфæ кодта наукон дæсныйадæй ректоры хæдивæг Тенгиз Тиникашвили. Æрыгон иртасджытæм дзургæйæ фæнысан кодта, форумы сæйраг цæджындз студенттæ кæй сты.
«Мах тынг фæнды, цæмæй студенттæм, куыд раздæр, фæзына цымыдисдзинад наукæмæ, наукон иртасæнтæм. Æнæмæнг хъæуы фыццаг курсæй наукон куыстмæ цæст дарын, кусын ног фæзилæнтыл, тырнын æнтыстытæм. Мах хъомыл кæнæм ног фæлтæр – наукон фæлтæр, уыдонæн сæ размæ ис хæс, ног технологитыл бакусын æхсæнадон, æрдзон наукæты æмæ æндæр зонадон хæйтты фæлгæтты», – загъта Тенгиз Тиникашвили.
Уый фæстæ форумы куыст ацыдис пленарон æрбадты. Уæрæсейы наукæйы райрæзты гæнæтæ æмæ йæ уавæры тыххæй архайджытæн радзырдта медицинон наукæты доктор, медико-техникон наукæты Академийы член-корреспондент Денис Иванов.
Актуалон иртасæнты ирддæр дæнцæгтæ уыдысты ЦИПУ-йы æрыгон, фæлæ фæлтæрдджын ахуыргæндты раныхас. ЦИПУ-йы конденсацигонд уавæры физикæйы кафедрæйы 1-æм курсы студент Елойты Даниэль бакаст доклад наукæ æмæ техникæйы нанороботтæй пайдакæнынады тыххæй, химикон наукæты кандидат Чаликиди Петракис базонгæ кодта архайджыты апсайклингы методимæ, йæ бон у зайæгой быронæй ахсджиаг химион æрмæг аразын.
ЦИПУ-йы системон экологон анализы лабораторийы хистæр нукон кусæг Дзампаты Жаннæ радзырдта иммунитет хи ныхмæ куы фæвæййы, уæд митохондриты куыст куыд æрцæуы хæлд, уый тыххæй. Ахуыргонд у Уæрæсейаг наукон фонды конкурсы уæлахиздзау æмæ рамбылдта грант зайæгойты æууæлтæ иртасынмæ атеросклероз дзæбæх кæнынæн. Йæ наукон проекты фæлгæтты уый ахуыр кæны зайæгойтæй райст биологион активон буаргъæды терапевтон архайд æмæ сæ ахадындзинад атерогенезы клеткæтæ-архайджытыл.
Уый фæстæ форумы архайджытæ фæкъордтæ сты нæ бæстæйы райрæзт æмæ наукон-технологион политикæмæ гæсгæ, превентивон æмæ сæрмагонд медицинæйæн, уæрæсейаг æхсæнады социалон-культурон иудзинады фидарæн, аразгæ интеллектæн æмæ машинæтыл ахуырæн, хими æмæ физикæйы фæлгæтты райрæзтытæн æмæ Уæрæсейы бæстыхæйтты рæзтæн нысангонд фондз секцийыл.
Райсом, кæфты мæйы 23 бон форумы кæронбæттæн æрбадты скæндзысты хатдзæгтæ секциты куыстæн, архайджытæн ратдзысты архайæджы сертификаттæ æмæ сын фæзындзæн сæ иртасæн куыст мыхуыры рауадзыны гæнæн уæрæсейаг индексацигонд рауагъды.
Владикавказский молодежный научный форум открылся в СОГУ к 105-летию вуза