Цæгат Ирыстоны паддзахадон университеты ацыдысты зындгонд ирон фыссæг, нывгæнæг æмæ рухстауæг Хетæгкаты Къостайы гуырæн бонмæ арæзт мадзæлттæ. Университет бацæттæ кодта тынг хъæздыг программæ, баиу кодтой зонадон-рухсадон æмæ сфæлдыстадон мадзæлттæ.
Традицимæ гæсгæ бæрæгбон райдыдта университеты сæйраг бахизæны æвæрд бюстмæ дидинджытæ бахæссынæй. Архайдтой дзы университеты разамонджытæ, ахуыргæнджытæ æмæ студенттæ.
Фыццаг хатт уæлдæр ахуырадон уагдон сарæзтой акци «Свет Коста» – кæй фæндыд, уый-иу бацыд сæрмагонд чыргъæдмæ æмæ иу систа фыссæджы æмдзæвгæтæй иу. Изæрæй акцийы архайджытæ æрæмбырд сты цыртдзæвæны цур æмæ бакастысты, цы æмдзæвгæтæ систой уыдон. Æмдзæвгæ кæсджытæн скодтой зæрдылдарæн лæвæрттæ æмæ уый фæстæ се ‘ппæт иумæ бакастысты Хетæгкаты Къостайы зындгонд æмдзæвгæ «Балцы зарæг».
Университеты факультеттæ дæр ссардтой фыссæджы ном. Журналистикæйы факультеты ацыд Хетæгкаты Къостайы цард æмæ сфæлдыстадæй викторинæ. Юридикон факультет сарæзтой конкурс: студенттæ кастысты æмдзæвгæтæ, равдыстой музыкалон æмæ хореографион номыртæ. Уырыссаг филологоийы факультеты студенттæ Ирон аргъуаны Пантеоны Къостайы цыртдзæвæнмæ бахастой дидинджытæ.
ЦИПУ-йы наукон библиотекæйы равдыстой Хетæгкаты Къостайы поэмæ «Фатимæ»-мæ гæсгæ киноныв «Фатимæ».
Ирон филологийы факультеты студенттæ та ацыдысты Хетæгкаты Къостайы райгуырæн хъæу Нармæ. Къостайы хæдзар-музейы бакастысты æмдзæвгæтæ, йе ‘мдзæвгæтæм гæсгæ азарыдысты зарджытæ æмæ сарæзтой хъазт.
Бæрæгбонæн арæзт мадзæлтты кæронбæттæн сси ЦИПУ-йы студенткæ Хъороты Мæдинæты персоналон равдыст «Рухстауджытæ»-ы байгом.
