Цæгат Ирыстоны Хетæгкаты Къостайы номыл паддзахадон университеты ацыд дыууæ уæлдæр ахуырадон уагдоны студактивы фембæлд – ЦИПУ æмæ Новосибирскы паддзахадон университет. Фембæлды архайдтой дыууæ уагдоны фæсивæдон политикæйы ректоры хæдивджытæ Кокайты Алан (ЦИПУ) æмæ Денис Обуховский (НПУ), фæсахуыр дæсныйады алы хуызты архайæг студенттæ-активисттæ: профцæдисон хайад, спортивон иугонд, волонтерты центр æмæ æндæр структурæтæ.
Фембæлды сæйраг нысан уыдис æргом æмæ пайдайаг диалог университеты æхсæнады райрæзтыл æнувыд студентты ‘хсæн. Студенттæ кæрæдзийæн дзырдтой алыхуызон мадзæлттæ цæттæ кæныны фæлтæрддзинадыл, сæ университетты студентон хиразамынды хицæндзинæдты тыххæй, активон æмæ бæрнон студентон æхсæнад аразынæн æххуысы хъæппæристыл.
Сæйрагдæр дзырд цыдис фæсивæдон проекттæм хъусдарыны механизмтыл, университетты администрациимæ ахастытыл, студентты ‘ргом здахын æрвылбон проблемæтæм. Зæгъæм, ЦИПУ-йы минæвæрттæ радзырдтой, ног ахуыры аз кæй сарæзтой алы факультеты дæр стройотрядтæ сæхи разамонджытимæ. Ахæм отрядтæ коменданттимæ иумæ архайынц æмæ æххуыс сты æрвылбон лыстæг куыстытæ кæныны. Сæвзæры бæрндзинады æнкъарæн, администарци æмæ студенттæ æмгуыст кæнынц.
Фембæлды уæлдай зæрдæмæхъаргæ темæ уыдис историон мысæн æмæ граждайнаг бæрны фарст. Новосибирскы паддзахадон университеты минæвæрттæ радзырдтой 2016 азæй рухæны мæйы 3-æм бон НПУ-йы арæзт Беслæны трагедийы амæттæгты номыл æрвылазон акцийы тыххæй. Ахуыргæнджытæ æмæ студентты уыцы хъæппæрис здæхт у 2004-æм азы трагедийы историон мысæнмæ æмæ фæсивæдмæ тæригъæды æнкъарæн æвзæрын кæнынмæ. Иннæ акци 2026 аз уыдзæн дæсæм хатт, юбилейон.
ЦИПУ-йы ректоры хæдивæг Кокайты Алан раарфæ кодта ахæм хъæпæрисы фæдыл æмæ бахаста фæндон, иннæ аз ЦИПУ-йы делегаци цæмæй ацæуой Новосибирскмæ, цæмæй Цæгат Ирыстоны студенттæ дæр бацархайой зæрдылдарæн акцийы.
Университеты царды фæлтæрдзинадæй уæлдай ма архайджытæ æрдзырдтой бирæ ахсджиаг фæрстытыл. Сæйрагдæр дзырдтой волонтерты æмæ патриотон змæлды райрæзтыл, сфæлдыстадон æмæ спортивон хъæппæристыл, ЦИПУ æмæ НПУ-йы ‘хсæн æмгуысты гæнæтыл.
Сæ зæрдæ дарынц фидæны дарддæры диалогыл: нæ бæстæйы æмвæнд æхсæнады ныффидарыл æмæ фæсивæдон политикæйы райрæзтмæ здæхт иумæйаг проекттыл, студентон делегациты, форумты æмæ нæдæр мадзæлтты архайдыл.
Ахæм фембæлдтæ тынг ахсджиаг сты уæлдæр ахуырадон уагдæтты ‘хсæн эффективон æмгуыстадæн, студентон æхсæнæдтимæ комкоммæ бастдзинæдтæ æмæ практикон æгъдауæй æххуысæн.