Цæгат Ирыстоны Хетæгкаты Къостайы номыл паддзахадон университет æрæмбырд кодта Уæрæсе æмæ хæстæгдæр фæсарæнты бæстæтæй зындгонд филологтæ æмæ лингвистты цифрон технологиты, уæлдайдæр æрхъуыдыгонд зонды фæзындимæ, æвзагзонынады актуалон фæрстытыл æрдзурыны фæдыл.
Ахуыргæндтæ сæ иртасæнтæ рæгъмæ рахастой ЦИПУ-йы æхсæнадæмон ахастыты факультеты арæзт II Æппæтуæрæсеон æхсæнадæмон архайдимæ наукон-практикон конференци «Вопросы филологии и лингводидактики в эпоху цифровизации» -йы.
Конференцийы архайдтой Азербайджан, Армени, Молдова, Хуссар Ирыстон æмæ Уæрæсейы уæлдæр ахуырадон уагдæтты кусджытæ æмæ ахуыргæнджытæ, студенттæ æмæ аспиранттæ.
ЦИПУ-йы ректор Огъуаты Аланы номæй уазджытæн раарфæ кодта фæсивæдон политикæ æмæ административон куысты ректоры хæдивæг Кокайты Алан. Конференци гом кæнгæйæ сын бузныг загъта, нырыккон æвзагзонынады проблемæтæм сæ цымыдисдзинады æмæ наукон æргом диалогмæ сæ цæттæдзинады тыххæй.
«Махæн æхсызгон у, ацы наукон форумы хуыздæр уæлдæр ахуырадон уагдæттæй зындгонд ахуыргæндтæ-филологтæ, лингводидактикæ æмæ культурæты ‘хсæн коммуникациты хайы специалисттæ кæй архайынц. Уырны мæ, ахæм архайджыты ‘хсæн кæй фæзындзысты ног наукон иртасæнтæ æмæ æхсæнадæмон æмгуыстад гуманитарон сферæйы кæй фæфидар уыдзæн», – загъта Кокайты Алан.
Конференцийæн æнтыстджын куыст сæ зæрдæ загъта РАН-ы æвзагзонынады Институты директор, типологи æмæ ареалон лингвистикæйы хайады сæргълæууæг, РАН-ы член-корреспондент, филологон наукæты доктор, профессор А.А.Кибрикæн æмæ РАН-ы В.В. Виноградовы номыл уырыссаг æвзаджы Институты директоры хæдивæг, РАН-ы æвзагзонынады Институты типологийы секторы сæргълæууæг, РАН-ы академик, филологон наукæты доктор, профессор В.А. Плунгянæн.
Мадзал нысангонд уыд нæ университеты фæсарæйнаг æвзæгты факультеты 80 азы юбилейæн. Æхсæнадæмон факультеты декан Сихъоты Мæдинæ радзырдта архайджытæн 1945 азы Цæгат Ирыстоны педагогон институты бындурыл фæсарæйнаг æвзæгты факультеты равзæрды æмæ йæ райрæзтмæ зынгæ бавæрæн бахæссæг сгуыхт педагогты тыххæй.
2020 азы баиу кодтой фæсарæйнаг æвзæгты факультет æхсæнадæмон ахастыты факультетимæ. Абон факультетæй рацæуынц бæрзонд квалификациимæ, иттæг хорз теоретикон цæттæдзинадимæ, æнцонæй цалдæр фæсарæйнаг æвзаг, нырыккон методикæтæ æмæ сæ амоныны технологи зонæг специалисттæ.
«80 азы дæргъы факультет баййæфта бирæ ивддзинæдтæ – йæ структурæ, ахуырадон программæты мидис, дисциплинæтæ, фæлæ æнæивдæй баззадысты специалисттæ цæттæ кæныны традицитæ уæрæх филологон цæстæнгасимæ æмæ фундаменталон гуманитарон цæттæдзинадимæ, мадæлон æвзагмæ æмæ культурæмæ зæрдиаг уарзондзинадимæ, стæй æндæр адæмты æвзæгтæ æмæ культурæтæ дæр. Йæ 80 азмæ нæ факультет йæ удæй у æрыгон æмæ рæстæгимæ кæны æмдзу!», – фæнысан кодта уый.
Уый фæстæ æвзагзонæн кафедрæты ахуыргæнджыты схорзæхджын кодтой ЦИПУ-йы арфæйы писмотæй æмæ кады гæххæттытæй сæ бæрзонд профессионализмы тыххæй. Университеты разамонджытæ раарфæ кодтой ветерантæн дæр, бирæ азты дæргъы сæхи студентты бацæттæ кæнынæн кæй снывонд кодтой, уый фæдыл.
Пленарон æрбадты сæ докладтæ бакастысты иртасджытæ А.С.Пушкины номыл уырыссаг æвзаджы Институтæй, Department of English Studies, Eötvös Loránd University, Х.М. Бербековы номыл ХъБПУ, КубПУ, СКФУ-йæ.
Сæ докладтæ нысангонд уыдысты ахсджиаг фæрстытæн, уырдæм бацыдысты æвзагзонынады теорийы райрæзт, аивадон дискурсы æвзагæй когнитивон аспекты пайда кæнын, цифровизацийы тæваг поэтикон сфæлдыстадыл æмæ поэзийы æвзаг иртасыныл, нырыккон неологизмты бынат культурон трансформацийы æмæ менталон æнæниздзинадыл националон дискурс аразынæн.
Конференци йæ куыст дарддæр ахæццæ кодта фондз секцийы. Нысангонд уыдысты иумæйаг æмæ абарстон-ныхмæвæрд æвзагзонынады фæрстытæн цифровизацийы дуджы, нырыккон когнитологийы проблемæтæн, дискурс куыд дисциплинæты ‘хсæн иртасæны объект, бирæнацион æхсæнады культурæты ‘хсæн коммуникаци æмæ бирæвзагондзинады проблемæтæн, лингводидактикæйы фæрстытæн цифровизацийы дуджы æмæ лингводидактикон тæлмацты зындзинæдтæн: нырыккон æвзарæнтæ æмæ сæ хатдзæгтæ.
Влияние цифровизации на язык обсудили на международной конференции в СОГУ