Цæгат Ирыстоны Хетæгкаты Къостайы номыл паддзахадон университеты Джеоргуыбайы мæйы 13-14 бонты ацæудзæн æхсæнадæмон архайдимæ Æхсæнадæмон наукон-практикон конференци «Исследование проблем и перспектив распространения русского языка, русской литературы и культуры в Исламской Республике Иран».
Конференцийы рæгъмæ рахæсдзысты уырыссаг æвзаг, литературæ æмæ культурæ Ираны куыд ахуыргонд цæуы уый раиртæсты хатдзæгтæ æмæ фæлтæрддзинад Уæрæсе æмæ Ираны уæлдæр ахуырадон æмæ наукон уагдæтты. Архайдзысты дзы 50 ахуыргондæй фылдæр – лингвисттæ, литературæ иртасджытæ, политологтæ, историктæ æмæ методисттæ Санкт-Петербург, Казань, Уфа, Стъарапол, Дзæуджыхъæу æмæ Ираны Республикæйæ. Уымæй уæлдай архайджытæн равдисдзысты культурон программæ дæр: уазджытæ базонгæ уыдзысты Цæгат Ирыстоны истори æмæ культурæимæ, бабæрæг кæндзысты Дзæуджыхъæуы культурон центртæ æмæ зæрдылдарæн бынæттæ.
Конференци райдайдзæн 9 сахатыл: университеты делегаци ирайнаг уазджытимæ бахæсдзысты дидинджытæ зындгонд ирон поэт, нывгæнæг æмæ рухстауæг Хетæгкаты Къоста, персайнаг поэт Фирдоуси æмæ драматург Александр Пушкины цыртдзæвæнтæм.
10 сахатыл ЦИПУ-йы ЮНЕСКО-йы залы байгом уыдзæн пленарон æрбадт, архайдзысты дзы Цæгат Ирыстоны парламенты сæрдар Тускъати Таймураз, республикæйы ахуырад æмæ наукæйы министр Алибегты Эллæ, РЦИ-Аланийы националон политикæ æмæ æддагон ахастыты министр Бæгъиаты Алан, Дзæуджыхъæуы Уæрæсейы Федерацийы МИД-ы минæвæрттæ æмæ уæрæсейаг уæлдæр ахуырадон уагдæтты ректортæ.
Конференцийы кадджын уаздзытæ уыдзысты Уæрæсейы Ираны минæварады наукæ æмæ ахуырады фæрстытæй сæйраг уынаффæгæнæг Али Мохагег, Алламе Табатабаийы номыл университеты президент Шоджа Ахмадванд.
Сæ наукон докладтæ бакæсдзысты ЦИПУ-йы ахуыргæндтæ æмæ онлайн-форматы Тегераны Алламе Табатабаийы номыл университеты иртасджытæ. Пленарон æрбадты хатдзæгтæм гæсгæ ацæудзæн дискусси, йæ модератор уыдзæн ЦИПУ-йы ректор Огъуаты Алан.
Дискуссийы фæстæ 14 сахатыл конференци йæ куыст адарддæр кæндзæн æртæ тематикон секцийы. Æркæсдзысты уырыссаг-ирайнаг æвзагон æмæ культурон æмахастытæм, ирайнаг ахуыргæнинæгтæн уырыссаг æвзаг амоныны нырыккон методикæтæм.
Джеоргуыбайы мæйы 14 бон скæндзысты конференцийы хатдзæгтæ: равзардзысты наукон докладтæ æмæ дискуссийы фæстиуджытæ.
Распространение русского языка и культуры в Иране обсудят в СОГУ