Национ иудзинады Бон Цæгат Ирыстоны Хетæгкаты Къостайы номыл паддзахадон университеты ацыд бæрæгбонæн нысангонд фыццагкурсонты сфæлдыстадон фестиваль «Зеленое яблоко».
Бæрæгбон райдыдта концертон залы бахизæны. Студенттæ бацæттæ кодтой сæ националон хæринæгтæ æмæ дзы суазæг кодтой фестивальмæ æрбацæуæг адæмы. Бирæ алыхуызон хæринæгтæй фынгтимæ базонгæ ЦИПУ-йы ректор Огъуаты Алан дæр. Уый бæрæгбонмæ æрбацыд йæ сывæллæттимæ. Студенттæ стыр цымыдисимæ ректорæн радзырдтой хæринæгты равзæрды истори, семæ баст легендæтæ æмæ адæмон кадджытæ.
Спортивон-дзæбæхгæнæн комплексы директор, нæ университеты кадджын хистæр, Дзобелаты Олик скуывта æртæ чъирийæ, раарфæ кодта бæрæгбоны фæдыл æмæ фæсивæдæн йæ зæрдæ загъта æнтыстытæ.
Бæрæгбоны сфæлдыстадон хай ацыд сценæйыл, студенттæ равдыстой сæ курдиат кафынæй, музыкæ æмæ поэзийæ. Æппæт номыртæ баст уыдысты, ЦИПУ-йы студентты ‘хсæн цы адæмыхатты минæвæрттæ ахуыр кæны, уыдоны националон культурæимæ. Алы номыр дæр уыд иудзинад æмæ алы культурæйæн дæр цыт кæныны атмосферæйы ирд стъæлфæн.
Ацы бон бахаста ЦИПУ-мæ ног традици. Фестиваль аразджытæ ныфс бавæрдтой, «Зеленое яблоко» æрвылаз ацы бон кæй бæрæг кæндзысты æмæ адæмыхæттыты ‘хсæн хæлардзинад æмæ æмархайды нысан кæмæн уыдзæн, ахæм цау кæй уыдзæн.
