Дзæуджыхъæуы байгом кодтой Уырыссаг географион æхсæнады æппæтуæрæсеон конкурсы равдыст «Самая красивая страна». Экспозици баиу кодта, Уæрæсейы æрдзон æмæ культурон хъæздыгдзинад æвдисæг проектты уæлахиздзауты фотофкуыстытæ.
Равдыст бацæттæ кодтой цыппурсы мæйы райдайæн уазæгуат «Владикавказ»-ы цур фæзуатыл. Экспозицимæ бацыдысты 30 хуыздæр хуызисты – нæ бæстæйы националон æмхуызонад æмæ культурон бынтæ æвдисæг цымыдисаг пейзажтæ, хъæддаг æрдзы кадртæ æмæ сюжеттæ.
Равдысты официалон байгоммæ æрбацыдысты республикæйы экономикон райрæзты Министрады, Дзæуджыхъæуы бынæттон хиуынаффæйады администрацийы минæвæрттæ, студенттæ æмæ скъоладзаутæ.
Уырыссаг географион æхсæнады дæсныйад æмæ конкурсы нысаны тыххæй радзырдта географи æмæ арæзтады кафедрæйы сæргълæууæг Хацъæты Фатимæ. Уый фæнысан кодта УГÆ-йы куыстæн уæрæх фæзилæнтæ кæй ис – æрдз хъахъхъæнынæй рухсадон хъæппæристæм æмæ фæсивæды наукон æмæ грантон проекттæм разæнгардмæ.
«Уырыссаг географион æхсæнады дæсныйад у бирæвæрсыг æмæ æххæсы историон-культурон бынтæ æмæ æрдз хъахъхъæныныл, ахуырад æмæ сæрмагондæй нæ бæстæйы истори æмæ географийы ахуырадыл. Йæ сæйраг нысан у фæсивæды æргом раздахын грантон проекттæ æххæст кæнынмæ. УГÆ-йы егъау проекттæй иу – «Самая красивая страна». Фыццаг хатт равдыст снысан кодтой 2015 азы. 750 къамистæй фылдæр 10 азмæ æрбарвыстой конкурсмæ алы номинацитæм. Нæ бæстæйы рæсугъддзинад æвдисæг хуызистытæ – хъæддаг сырдтæ, нæ адæмы националон иудзинад, культурон бынтæ», – загъта Хацъæты Фатимæ.
Уырыссаг географион æхсæнад нæ бæстæйы культурон хæзнатæ бахъахъхъæнынмæ цы зынгæ бавæрæн бахаста, уый тыххæй загъта Цæгат Кавказы федералон зылды туризмы къабазы куыстдæттæг Ассоциацийы разамонæг Æбийты Валерæ. Уый фæнысан кодта, историон æмæ культурон бынты рапарахатæн ахæм фæндтæ ахсджиаг кæй сты.
«Уырыссаг географион æхсæнад бахаста тынг стыр бавæрæн фæсивæды хъомылады культурон бынтæ бахъахъхъæныны. Ахæм проекттæн аргъ нæй, уымæн æмæ нæ бæстæйы культурон хæзнаты хъæздыгдзинад æвдисынц – адæмыхæттыты бирæвæрсыг хицæндзинæдтæ æмæ цы диныл хæст сты, уый», – загъта Æбийты Валерæ.
Равдыст фенæн уыдзæн цыппурсы мæйы кæронмæ.
Æрвылазон фотоконкурс «Самая красивая страна» у Уæрæсейы æрнæг æрдз бахъахъхъæнынæн æмæ нæ алфамбылай æхсæнадмæ арæхстгай ахаст хъомыл кæнынæн нысангонд Уырыссаг географион æхсæнады егъау медиапроект. Фыццаг хатт ацыд 2015æм азы.