Тугъанты Махарбеджы номыл Паддзахадон аивадон музейы ацыд официалон егъау æхсæнадон-паддзахадон ирон æвзаджы цифровизацийы программæйы презентаци. Йæ куысты архайынц ЦИПУ-йы ирон филологийы ахуыргæнджытæ æмæ студенттæ.
Программæйы сæйраг кусæнгарз уыдзæн гом онлайн-платформæ Ossetic.ru, æвзагон æрмæг æмбырд кæнынæн æмæ йыл бакусынæн. Платформæйы бафыст тæлмацгæнджытæ æмæ бархионтæн сæ бон уыдзæн фразæты тæлмацгонд варианттæ дæттын уæрæх корпусæй. Уый бындурыл кусы ныртæккæ Яндекс.Переводчик. Тæлмацтæ бæрæг кæндзысты модератортæ-эксперттæ.
Ацы куыст зынгæ фæхуыздæр кæндзæн проекты технологион партнер –компани Яндексы лæвæрд машинæйы тæлмацы бæлвырддзинад. Цæмæй архайджытæ æнувыддæрæй архайой, уый тыххæй та уыдзæн рейтингы системæ – конкуренци.
Проекты сæйраг нысан – ирон æвзаг скæнын цифрон дуджы «уынгæ æмæ хъусгæ». Проекты хатдзæгтæм гæсгæ ирон æвзаджы хъæлæс фæзындзæн зындгонд сервистыл Яндекс.Алиса и Giga.Chat, æрхъуыдыгонд зонды сервистæ райдайдзысты æмбарын ирон ныхас, кæсын сайттыл тексттæ, субтитртæ, пайда кæнын хъæлæсон агурæнæй.
Программæ рауадзыны фæнд бахаста АНО «Фонд цифровизации осетинского языка». Презентацийы архайдтой Республикæ Цæгат Ирыстон-Аланийы Сæргълæууæг Сергей Меняйло, республикæйы Парламенты сæрдар Тускъати Таймураз, хицауады уæнгты минæвæрттæ, наукон æхсæнад, филологтæ æмæ æхсæнадон архайджытæ.
Презентацийы рæстæг проекты райрæзты ЦИПУ цы бавæрæн бахста, уый тыххæй радзырдта ирон филолгийы факультеты декан Гуытъиаты Эльмирæ. Куыд загъта, афтæмæй куыд студенттæ æфтæ фæлтæрдджын ирон æвзаг иртасджытæ дæр, проекты архайгæйæ, сæхицæн байгом кодтой ног лингвистикон фæзилæнтæ æмæ гæнæнтæ сæ профессионалон рæзтæн.
«Куыд адæймаг, ирон æвзаджы хъысмæтыл ма хъуыды кæнын йæ бон кæмæн нæу, мæн уырны, ахæм егъау проект ма иу хатт кæй фæнысан кæндзæн на культурæ бахъахъхъæныны ахсджиагдзинад, уыимæ цифровизацийы хуызы дæр. Махæн фыццаджыдæр ацы проект у, фæсивæды зæрдæмæ чи цæуы, ахæм стыр патриотон æмæ нырыккон хъуыддаг. Мæ зæрдæ дарын, нæ бон ма кæй суыдзæн проектмæ æрбаздахын мадæлон æвзаджы фидæн цифрон дуджы чи уыны, ахæм æппæты курдиатджын студентты æмæ иртасджыты», – загъта Гуытъиаты Эльмирæ.
Йæ куысты фæлтæрддзинады тыххæй ирон æвзаджы корпусы фразæты тæлмацы радзырдта ЦИПУ-йы ирон филологийы факультеты студенткæ Хъуыбадты Аминæ.
«Мæнæн ацы проект тынг фæпайда мæ профессионалон рæзты. Хъуыдыйæдтæ куы фæтæлмац кæныс, уæд агурыс æппæты растдæр æмæ рæсугъддæр вариант – уый тынг фæхъæздыг кæны дзырдуатон æвæрæнтæ. Хъуыдыты ацæуыс, агурыс ног дзырдтæ царды алыхуызон сферæты. Æрмæст зонындзинæдтæ нæ фæфылдæр вæййынц, фæлæ ныхас кæнынмæ дæр арæхсыс рæвдздæр. Мæнæн тынг æхсызгон у, мæ хæрз чысыл бавæрæн дæр ирон æвзаг бахъахъхъæнынæн æмæ йæ райрæзтæн кæй феххуыс уыдзæн, нæ республикæ æмæ нæ адæмæн мæ бон исты скæнын кæй у. Мæн тынг фæнды, цæмæй ирон æвзаджы номыл йæ тыхтæ чи нæ бавгъау кæна, ахæм адæм фылдæрæй-фылдæр кæной», – загъта Хъуыбадты Аминæ.
Программæ арæзт цæуы АНО «Фонд цифровизации осетинского языка»- хъæппæрисæй, Республикæ Цæгат Ирыстон-Аланийы Сæргълæууæджы æххуысæй. Проекты архайынмæ сразæнгард кодтой экспертон æхсæнад, ирон æвзаджы райрæзтыл æнувыд чи сты æмæ регионы æххæстгæнæг хицауады уæнгты, меценатты. Проекты райдайæн технологион партнер – Яндекс.
