Цæгат Ирыстоны Хетæгкаты Къостайы номыл паддзахадон университеты кадджын уавæры байгом кодтой юридикон клиникæ – социалон ахсджиаг ахуырадон проект. Йæ фæлгæтты студенттæ-юристтæ сæ ахуыргæнджытæ æмæ кусæг специалистты разамындæй фæкæсдзысты барады хайы æххуысхъуаг адæммæ лæвар.
Ахæм проект бацæттæ кæнын бантыст УФ Паддзахадон Думæйы депутат, æртæхаттон олимпаг чемпион, ЦИПУ-йы юридикон факультеты рауагъдон Таймæзты Артуры руаджы. Уый фæрцы бацалцæг кодтой клиникæйы бæстыхай, цæмæй фидæны студентты практикон цæттæдзинад æмæ адæмæн æххуыс цæуа нырыккон аккаг уавæрты. Юридикон клиникæмæ йæ фыццаг кусæн бон æрбацыдысты ЦИПУ-йы ректор Огъуаты Алан, Паддзахадон Думæйы депутат Таймæзты Артур, РЦИ-А адæймаджы барты æвджиддар Кокайты Артур, æмæ сывæллæтты барты æвджиддар Плиты Тамарæ.
ЦИПУ-йы ректор Огъуаты Алан архайджытимæ фембæлды рæстæг раарфæ кодта меценатæн университеты райрæзтмæ цы бавæрæн бахаста, уый фæдыл, фæнысан кодта проекты ахсджиагдзинад куыд юридикон ахуырады системæйы, афтæ æхсæнады.
«Юридикон клиникæ у ахсджиаг ахуырадон æмæ социалон тыгъдад. Ам студенттæн фæзындзæн сæ зонындзинæдтæ практикæйы равдисыны, реалон барадон зындзинæдтимæ сæмбæлыны æмæ сæ равзарыны фадат. Уый у царды æцæг скъола, теори дзы рахизы æцæгдзинадмæ», – загъта ректор.
Проекты хъæугæдзинад фæбæрæг кодта Паддзахадон Думæйы депутат Таймæзты Артур дæр.
«Ацы хъæппæрис сæххæст кæнынмæ баххуысы фæдыл мын куы загътой, уæд, кæй зæгъын æй хъæуы, сразы дæн, уымæн æмæ æцæгæй дæр у абон тынг хъæугæ проект. Фыццаджыдæр сæйраг у, Центры профессионалон юридикон консультаци райсын хъуаг чи у, уыдонæн се ‘ппæтæн дæр кæй баххуыс кæндзысты: нæ хистæртæн, бирæ сывæллæттимæ бинонтæн, се ‘нæниздзинадмæ гæсгæ æвадат чи сты. Фæнды ма мæ фæнысан кæнын уый, æмæ хицæн къорд кæй сарæзтам сæрмагонд æфсæддон операцийы архайджытæн æмæ сæ бинонтæн чи æххуыс кæндзæн. Æмæ, кæй зæгъын хъæуы, Центр уыдзæн студентты практикæйы базæ университеты, уымæн æмæ юристы куысты фæлтæрддзинад сæрмагонд у», – загъта Артур.
Юридикон клиникæйы байгомы фæстæ сарæзтой адæмы фыццаг райст. Таймæзты Артур студенттæ æмæ сæ зондамонджытимæ байхъуыстой курдиæттæм æмæ сын сбæрæг кодтой сæ барадон æххуысы гæнæнтæ.
Клиникæйы куысты куратор æмæ студенттæн зондамонæг уыдзæн æххæстгæнæг директоры хæдивæг – Уæрæсейы юристты Ассоциацийы Аппараты разамонæг, Уæрæсейы юристты Ассоциацийы Цæгат Ирыстоны регионалон хайады сæрдар Лазарты Алан.
ЦИПУ-йы юридикон клиникæ сарæзтой 2009 азы Республикæ Цæгат Ирыстон-Аланийы Конституцион тæрхондоны раздæры сæрдар, профессор Хъесаты Станиславы хъæппæрисæй. Йæ дæсныйады архайдтой иттæг хорз ахуыргæнæг студенттæ, сæ ахуыргæнджыты разамындæй лæвæрдтой юридикон консультацитæ. Фæстæдæр клиникæйы куыст техникон уавæртæм гæсгæ баурæдта. Абон, йæ куыст фæхуыздæр кæнгæйæ, проектæн ис ног райрæзт.
