Дзæуджыхъæуы 18-æм скъолайы ацыд Уырыссаг географион æхсæнады презентаци «Парты открытий». Уый уыд сæрмагонд хæрзиуæг скъолайæн рухсадон конкурс «Классная география»-йы æнтыстджын архайды фæдыл.
Ахуырадон уагдон бацыд конкурсы 50 скъола-полуфиналисттæм, хæрзиуæджы хуызы партæтæ сфæлыстой УГÆ-йы зындгонд уæнгты номыл, не ‘мбæстаг-раргомгæнджытæ, балцыцæуджытæ æмæ ахуыргæндтæ-географтæй.
18-æм скъолайы архайыны фæнд бахаста географийы ахуыргæнæг æмæ УГÆ-ы уæнг Дзгойты Бэллæ. Проекты нысан уыдис равдисын, географийы кабинет æрмæст картæтæ æмæ чингуыты фæзуат кæй нæу, фæлæ алы ахуырдзау дæр кæм разæнгард кæны, йæхицæн алывæрсыг дуне кæм гом кæны.
Цæгат Ирыстоны Уырыссаг географион æхсæнады хайады разамонæг, ЦИПУ-йы ректор Огъуаты Алан фæнысан кодта, презентаци УГÆ-йы 180 азмæ æмæ хæхты Æхсæнадæмон бонмæ арæзт кæй æрцыд. Æхсæнады дæсныйад кæй иу кæны, сæ райгуырæн зæхх, истори æмæ культурæ чи уарзы, уыцы адæмы.
«Уырны мæ, географийæ зонындзинæдтæ уын уæ царды æппынæдзух æххуыс кæй уыдзысты. Истори æмæ географи сты удыхъæд аразæг дыууæ бындурон предметы. Географи уын уыдзæн ахæм фундамент, фадат уын чи ратдзæн дунейы цæуæг цаутæ критикон хуызы æмбарын æмæ сын анализ кæнын. Æхсызгон мын у, ахæм зондамонджытæ уын кæй ис – уæ ахуыргæнджытæ. Уыдон уын æххуыс кæнынц размæ цæуын æрмæст наукæйы нæ, фæлæ царды мидæг дæр. Æнхъæлмæ уын кæсæм уе ‘нтыстытæм, республикæйы арæзт проектты æмæ иртасæн куыстыты. Уæ хъæппæристæ æмæ ног фæндтæ рæгъмæ хæссынæй ма тæрсут – нæ хайад уын кæдфæнды дæр феххуыс кæндзæн!», – загъта Огъуаты Алан.
Арфæйы ныхæстæ загътой Дзæуджыхъæуы бынæттон хиуынаффæйады администрацийы сæрдары хæдивæг Ходы Мæдинæ æмæ РЦИ-Аланийы ахуырад æмæ наукæйы министры хæдивæг Андрей Шевцов дæр. Уазджытæн равдыстой документалон киноныв Уырыссаг географион æхснадыл, йæ дæсныйады фæлгæтты скъолайы куысты æмæ зындгонд балцыцæуæг æмæ раргомгæнæг Николай Пржевальскийы тыххæй. Йæ ном ын сæнусон кодтой ног партæйыл.
Михаилы фырт Николай Пржевальский уыдис уырыссаг географ, балцыцæуæг æмæ æрдзиртасæг, цалдæр экспедицийы уыдис Астæуккаг Азийы, иртæста Монголи, Цæгат Китай æмæ Тибеты территоритæ. Зындгонд у йæ иртасæн куыстытæй, йæ сырдтæ æмæ зайæгойты уæрæх коллекцийæ, фæстæдæр йæ ном хæссæг хъæддаг бæхты ног хуыз байгомæй.
Презентацийы «Парту открытий»-йы байгом кæнын æмæ æрбадыны бар радтой Ходы Мæдинæ æмæ Огъуаты Аланæн.
Мадзал кæронмæ ахæццæ кодтой скъолайы холлы равдыст «Неделя географии»-йæ, уым ахуырдзаутӕ равдыстой се сфæлдыстадон куыстытæ географион темæтыл.
Во Владикавказе торжественно открыли парту Русского географического общества