Цæгат Ирыстоны Хетæгкаты Къостайы номыл паддзахадон университеты кадджын уавæры радтой сертификаттæ профоринтацион проект «Педагогическая проба»-йы æртыккаг сезоны рауагъдонтæн.

2026 азы проекты рауагъдонтæ сты 71 скъоладзауы. Æнтыстджынæй ацыдысты программæ æмæ райстой сертификаттæ. Уыдон сын дæттынц ЦИПУ-мæ бакалавриаты ахуырадон программæмæ гæсгæ педагогон дæсныйад райсынмæ цæугæйæ уæлæмхасæн 5 баллы сæ индивидуалон сгуыхтыты тыххæй.

Скъоладзаутæн семæ бацин кæнынмæ æрбацыдысты проекты фыццаг æмæ дыккаг сезоны рауагъдонтæ дæр. Уыдон радзырдтой «Педагогон проба»-йы сæ архайды тыххæй æмæ проекты тæваг сæ профессионалон равзæрстыл куыд фæзынд.

Сертификаттæ рауагъдонтæн радтой ЦИПУ-йы ректор Огъуаты Алан æмæ Республикæ Цæгат Ирыстон-Аланийы ахуырад æмæ наукæйы министры хæдивæг Дзанайты Марк.

 «Фæнды мæ баууæндын, ахуыргæнæджы професси уын уæ зæрдæтæ кæй бацагайдта. Уымæн æмæ педагог у профессийы равзæрст нæ, фæлæ фылдæр курдиат. Нæ университет та у ахæм бынат, ахуыргæнджыты кæм бацæттæ кæнынц, царды уаджы егъау зилдухæн кæм ис, зондамонджытæ кæм не ‘вгъау кæнынц сæ зонындзинæдтæ иннæтæн. Алкæмæн дæр уæ уыдзæн йæхи фæндаг профессионалон рæзты. Æмæ йæм мах бар кæй дарæм, уый Цæгат Ирыстоны паддзахадон университетæн тынг æхсызгон у. Мæ зæрдæ дарын, ацы фæндаг кæй равзардзыстут æмæ хуыз    дæр ахуыргæнджытæ кæй суыдзыстут», – загъта Огъуаты Алан.

Кадджын мадзалы фæлгæтты арфæйы фыстæджытæй схорзæхджын кодтой проекты цыды активон архайæг педагогтæ-зондамонджыты æмæ ЦИПУ-йы ахуыргæнджыты, проект «Педагогическая проба»-йы разамонджыты.

Проект «Педагогическая проба» здæхт у нырыккон ахуырадон системæйы ахуыргæнджыты бæрнон куыстмæ фылдæр цæстдардмæ, скъоладзауты педагогон курдиат раргом кæнынмæ æмæ барвæндæй фидæны профессийы равзæрстмæ. Проекты фæлгæтты уæлдай цæстдард цæуы ахуыргæнæджы профессийы бæрзонд æмвæзад æмæ йын йæ ахсджиагдзинад нырыккон ахуырадон системæйы равдисынмæ.

Проекты архайды скъоладзаутæ ацæуынц ахуырадон интенсив, местер-класстæ ахуырадон дисциплинæтæ амоныны методикæйæ, стæй ахуырадон процессы психологон-педагогон æххуысы бындурон зонындзинæдтæй.

Более 70 школьников Северной Осетии стали выпускниками проекта «Педагогическая проба»