Цæгат Ирыстоны Хетæгкаты Къостайы номыл паддзахадон университеты Ахуыргонд советы радон æрбадты æрдзырдтой кадрон фæрстытыл, ныффидар кодтой бынæттон нормативон акттæ æмæ университеты фæсивæдон политикæ æмæ хъомыладон куыстæн хатдзæгтæ скодтой.
Совет йæ куыст райдыдта финанстæ, бухгалтерон хыгъд æмæ хъалонæвæрды кафедрæйы доцент Галазты Маринæйæн экономикон наукæты докторы дипломы кадджын лæвæрдæй. Ахуыргонд советы сæрдар, ЦИПУ-йы ректор Огъуаты Алан фæбæрæг кодта, абон нæ университеты кæй кусынц наукæты 47 докторы æмæ 277 кандидаты. Зæрдыл æрлæууын кодта финансон разæнгарды системæ: 300 мин сомы докторы къæпхæн райсгæйæ, 100 мин сомы кандидаты къæпхæн райсгæйæ æмæ докторы диссертаци 35 азмæ бахъахъхъæнæгæн 500 мин сомы.
Наукон дæсныйад «Всеобщая история»-йæ доценты ном райсынмæ снысан кодтой историон наукæты кандидат Гæбуты Афанасийы. Æвзæрст æрцыдысты педагогон кусджыты бынæттæм кандидатурæтæ.
Фæсивæдон политикæ æмæ хъомыладон куысты тыххæй радзырдта ЦИПУ-йы фæсивæдон политикæ æмæ админстративон куысты ректоры хæдивæг Кокайты Алан. Ныхас цыд проекттыл, бындурон сгуыхтытыл æмæ куысты сæйрагдæр фæзилæнтыл. Дзырдта фидæнмæ снысангонд гæнæнтыл.
Проректор куыд фæнысан кодта, афтæмæй унверситеты æнтыстджынæй арæзт æрцыдысты патриотон, культурон-сфæлдыстадон, спортивон, бархион æмæ социалон фæзилæнтимæ мадзæлттæ. Системон куыст цæуы студентты психологон уавæрыл. Университеты кусы психологон æххуысы Центр.
Снысангонд ногдзинæдты ‘хсæн уыдысты спортивон клубы сарæзт, студентты æхсæнадон иугæндты риестры сæвзæрд, карьерæ æмæ ног фадæтты Центры байгом. Проректор фæбæрæг кодта декантæ, куратортæ æмæ студентон æхсæнадты куыст, раарфæ сын кодта сæ активондзинады тыххæй æмæ университеты æхсæнады райрæзтмæ цы бавæрæн бахастой, уый фæдыл.
Æрбадты кæрон æркастысты паддзахадон экзаменацион къамисы куысты отчеттæм æмæ паддзахадон кæронбæттæн аттестацийы фæстиуджытæм, ныффидар кодтой аспирантурæмæ райсты æмæ кæронбæттæн аттестацийы домæнтæ, Æфсæддон ахуырадон центры дæсныйады уагæвæрд. Уымæй уæлдай, рахастой уынаффæ къорд студенты суæгъд кæнын ахуырæн фидынæй.
