Цæгат Ирыстоны Хетæгкаты Къостайы номыл паддзахадон университеты ног азы фыццаг хатт ацыд Ахуыргонд советы æрбадт. Фембæлды рæстæг ныффидар кодтой 2026-æм азмæ абитуриенттæ райсынæн ахсджиаг бынæттон нормативон акттæ.
Æрбадт байгом кодтой ЦИПУ-йы пресс-секретарь Хацырты Аленæйæн мыхуыр æмæ дзыллон коммуникациты Комитеты номæй кадджын хорзæх раттынæй йе ‘нтыстджын куыст æмæ дзыллон хабархæссæг фæрæзтимæ пайдайаг æмгуысты фæдыл.
Фидæны ахуыры азмæ абитуриентты исыны фæткы сæрмагонд ивддзинæдты тыххæй радзырдта исæн къамисы нымæрдар, абитуриенттимæ куысты хайады хицау Хожая Аннæ.
Ног фæткмæ гæсгæ университетæн ис бар сбæрæг кæнын астæуккаг профессионалон ахуырады дæсныйады æмбар ахаст уæлдæр ахуырады дæсныйадмæ. Æмбæлон ахаст сын куы нæ уа, уæд абитуриенттæн сæ бон уыдзæн бацæуын æрмæст ЕГЭ- ты хатдзæгтæм гæсгæ.
Ивддзинæдтæ бахастой фæсарæйнаг студенттæ исыны æгъдаумæ дæр. 2026 æзæй фæстæмæ фæсарæнтæй чи цæуа ахуырмæ, уыдон университеты дæтдзысты экзаментæ æрмæст ЕГЭ-тæ сын цы предметтæй нæ уыд, уыдонæй. Уымæй дæр, ЕГЭ-тæн се ‘мгъуыд цыппар азы онг.
Уымæй уæлдай, уæлæмхасæн ахуырад кæмæ ис сфæлдыстад, физкультурæ æмæ спортæй, уыдонæн нымад цæудзысты индивидуалон сгуыхтдзинæдты хуызы уыцы ахуырады здæхт æвзаргæйæ.
Ахсджиаг ногдзинад бахастой гæххæттытæ бадæттыны фæткмæ дæр: 2026-æм азæй курдиæттæ университеты сайтыл нал уыдзæн бадæттæн, æрмæст сервис «Госуслуги»-йы.
Каст æрцæудзæн снысангонд бацæуынæн бармæ дæр, Уæрæсейы Федерацийы наукæ æмæ уæлдæр ахуырады Министрад та цалдæр ахуырады здæхтмæ коммерцион бынæттæн скодта бæлвырд бæрц.
2026-æм азы ЦИПУ фæнд кæны райсын бюджетон бынæттæм бакалавриат, специалитет æмæ магистратурæйæ 867 студенты.
Æрбадты хатдзæгтæм гæсгæ Ахуыргонд советы уæнгтæ æмвæндæй ныффидар кодтой ног домæнтæм гæсгæ срастгонд бынæттон нормативон документтæ. Сæ хыгъды исæн, экзаменацион æмæ аппеляцион къамисты уагæвæрдтæ æмæ исæн экзаменты цыды регламент.
В СОГУ утвердили ключевые изменения правил приема абитуриентов на 2026 год