Дзæуджыхъæуы Националон наукон библиотекæйы ацыд Цæгат Ирыстоны журналистты Цæдисы II съезд. Уыдысты дзы профессионалон æхсæнады минæвæрттæ, барады органтæ æмæ медиасферæйы хуыздæр эксперттæ.
Боны фæтк – фæстаг фондз азы куысты хатдзæгтæ скæнын, фидæнмæ сæйраг нысæнттæ сбæрæг кæнын, равзарын сæрдар æмæ разамынд дæттæг органтæ сбæрæг кæнын, фæтк ныффидар кæнын, муниципалон ахуырады бынæттон хайæдты сарæзт æмæ Уæрæсейы журналистты Цæдисы хорзæхтæ раттын.
Конференцийы куысты архайдта журналистты Цæдисы сæрдар Владимир Соловьев. Уазджыты ‘хсæн уыдысты хицауады сæрдары хæдивæг Платы Альбинæ, республикæйы парламенты спикер Тускъати Таймураз æмæ Дзæуджыхъæуы Æмбырды минæвæртты сæргълæууæг Таболты Сергей.
Цæгат Ирыстоны Хетæгкаты Къостайы номыл паддзахадон университеты ректор Огъуаты Алан раарфæ кодта конференцийы архайджытæн æмæ уазджытæн. Фæнысан кодта университеты бирæ азты зынгæ æмгуыст профессионалон журналистон æхсæнадимæ, зæрдыл æрлæууын кодта ЦИПУ-йы журналистикæйы факультеты байгом.
Загъта, журналистты Цæдис бирæ азты дæргъы кæй у æууæнкаг æмцæдисон университетæн, университет та республикæйы бирæ журналистты фæлтæртæн у сырæзты бынат. Уæлдай арфæйы ныхæстæ Огъуаты Аланæн здæхт уыдсты Мæхæмæтты Ахуырбегмæ, ректор куы уыдис, уæд факультеты сæвзæрдмæ бахаста зынгæ бавæрæн.
«Мæхæмæтты Ахуырбеджы ном ма æрымысын раст нæ уыдзæн – республикæйы журналистты Цæдисы уæнг æмæ ЦИПУ-йы ректор уæвгæйæ йæ бон цы уыдис, уый сарæзта журналистикæйы факультеты фæзындæн. Иу æмæ дыууæ хатты нæ дзырдта, цы зындзинæдтæ баййæфта æмæ цы цæлхдуртæ лæууыдысты йæ размæ. Стыр æххуыс бакодта уæд советон актер, Кавказы сæраппонд хæстыты архайæг Владимир Этуш, зæрдиагæй ахæм уынаффæйыл сразы уæвгæйæ. Факультет æнтыстджынæй рæзыд профессионалон æхсæнады зындгонд тыхджын ахуыргæнджыты фæрцы.
Æрмæст Цæгат Ирыстоны паддзахадон университет Цæгат Кавказы фыццаг байгом кодта журналистикæйы факультеты бындурон кафедрæ. Абон нæ студенттæн ис практикæ ацæуыны фадат, дзыллон информацион фæрæзты куысты архайын æмæ нырыккон медиасферæйы пайдагонд хуыздæр информацион технологитæ базонын», – загъта Огъуаты Алан.
Сæ бæрзонд профессионализм æмæ бирæ азты сæ намысджын фæллойы тыххæй Уæрæсейы журналистты Цæдисы цытджын грамотæтæй схорзæхджын кодтой ЦИПУ-йы ахуыргæнджытæ æмæ рауагъдонты, уыдонимæ журналистикæйы факультеты декан Хæбæлаты Фатимæ. Риуылдарæн нысан «За услуги»- радтой ЦИПУ-йы журналистикæ æмæ медиакоммуникацийы кафедрæйы доцент Хозиты Барисæн.
Уæрæсейы журналистты Цæдисы уæнгтæ систы факультеты ахуыргæнджытæ – Рæмонаты Эльзæ, Бабочити Мæдинæ, Дойаты Зæлинæ, Дзанайты Аленæ, Цæраты Лилия, Гахаты Зæлинæ. Журналистикæйы факультет схорзæхджын кодтой Уæрæсейы журналистты Цæдисы дипломæй фыдыбæстæйон журналистикæйы райрæзтмæ зынгæ бавæрæн бахасты тыххæй.
Алан Огоев принял участие во II съезде Союза журналистов Северной Осетии