Цæгат Ирыстоны Хетæгкаты Къостайы номыл паддзахадон университеты кусын райдыдта кълеткæтæ иртасынæн лаборатори, фундаменталон иртасæнтæ агурынæн кълеткæ æмæ молекулярон биологийы къабазы.
Лаборатори сцалцæг кодтой нырыккон кусæн дзаумæттæй адæймаг æмæ цæрæгойы кълеткæтыл архайынмæ, уый та дæтты фадат бæрзондтехнологион иртасæнтæ аразынæн биомедицинæйы къабазы – иммунологи, микробиологи æмæ æндæрты.
ЦИПУ-йы ректор Огъуаты Аланы ныхасмæ гæсгæ, нырыккон лабораторийы сарæзт у стратегион къахдзæф университеты зонадон инфраструктурæйы райрæзты æмæ биомедицинæйы къабазы хуыздæр иртасæнты архайды.
«Мах иттæг хорз æмбаргæйæ сифтонг кодтам лаборатори нырыккон кусæн гарзæй. Махæн ахсджиаг уыд, цæмæй ЦИПУ-йы лаборатори дунеон стандарттæн æмæ домæнтæн дзуапп дæтта биомедицинон иртасæнтæ кæнгæйæ. Уый фадат дæтты нæ ахуыргæндтæн кусын хуыздæр зонадон центрты æмрæнхъ æмæ аразын медицинæ æмæ æхсæнадæн нысаниуæгджын проекттæ», – фæбæрæг кодта ректор.
Ныртæккæ лабораторийы цæуынц активон зонадон иртасæнтæ, здæхт сты дзæбæх кæнын æмæ социалон ахадгæдæр низтæ развæлгъау базонынæн ног методты рацарæзтмæ.
Лабораторийы зонадон фæзилæнтæй иу у социалон ахадгæдæр низ атеросклероз дзæбæх кæнынæн инновацион методты рацарæзт. Ацы низ у æппæт дунейы адæмты мæлын æмæ инвалид суæвыны сæйрагдæр аххосæгтæй иу. Атеросклероз у ахæм низ, кæцыйы аххосæй артериты къултыл холестерин сæвзæрын кæны атеросклеротикон тæппæлтæ, уый фæдыл дадзинты туг æвзæр фæцæуы æмæ асайы инфаркт æмæ инсультмæ.
Иртасæныл куыст цæуы Уæрæсейаг зонадон фонды мадзал «Инициативные исследования для молодых ученых»-ы гранты фæлгæтты.
Ахуыргæндты дзæбæх кæныны методы рацарæзт здæхт у митохондриты функциты куыстмæ – энергион ивддзинæдтæн дзуаппдæттæг кълеткæйон органеллæтæ. Атеросклерозимæ сæ куыст хæлд æрцæуы æмæ уæфты ферхæм фæкарздæр вæййы.
Иртасæны хатдзæг уыдзæн хосы формулæйы рацарæзт.
«Абон мах, ЦИПУ æмæ Никитæйаг ботаникон цæхæрадонимæ æмгуысты фæлгæтты аргъ скодтам экологион сыгъдæг хомагæй ист экстрактты эффективондзинад. Кæрдæджыты комбинациты бындурыл рауагътам цалдæр æнтыстджын хосы формулæйы. Ныртæккæ сын сæ пайдайыл кусæм цалдæр кълеткæтæй рæгъытыл – уыдон сты атеросклерозы архайæг бындурон кълеткæтæ: эндотелиалон кълеткæтæ, адæймаджы аортæйы лæгъзхæцъæфон кълеткæтæ æмæ иммуннон кълеткæтæ – моноциттæ. Дарддæр фæнд кæнæм кусын фитопрепаратты эффективондзинадыл эксперементалон цæрæгойтыл», – фæбæрæг кодта ЦИПУ-йы системон экологион анализы лабораторийы хистæр зонадон кусæг.
Фидæны лаборатори йæ куыст хъавы фæуæрæхдæр кæнын æмæ ацæуын аккредитаци. Уый фæрцы йæ иртасæн гæнæнтæ уыдзысты фылдæр æмæ саразæн ис кълеткæты культурæты биоколлекци.
