Цæгат Ирыстоны Хетæгкаты Къостайы номыл паддзахадон университеты райдыдта цæуын профориентацион проект «Педагогическая проба. Абитуриент СОГУ»-йы цыппæрæм сезон.
Кадджын уавæры йæ байгом кодтой ЮНЕСКО-йы залы, æрæмбырд дзы ахуыргæнæджы профессиимæ базонгæ уæвын æмæ фыццаг къахдзæфтæ скæнын ахуыргæнæджы дунемæ кæй фæнды, ахæм 150 хистæркъласоны республикæйы алы скъолатæй.
Мадзал байгом кодта ЦИПУ-йы наукон дæсныйадæй ректоры хæдивæг Тенгиз Тиникашвили. Уый раарфæ кодта архайджытæн, фæнысан кодта педагогон дæсныйаы ахсджиагдзинад нырыккон царды æмæ скъоладзаутæн йæ зæрдæ загъта æнтыстджын куыст, разæнгарддзинад æмæ ног раиртæстытæ.
Бæстон проекты нысæнттæ, хæстæ æмæ этапты тыххæй архайджытæн радзырдта программон разамонæг, педагогон ахуырады кафедрæйы доцент Тайсаути Беллæ. Бамбарын кодта, цавæр гæнæгтæ ис хъусджытæн æмæ сын «Педагогическая проба» куыд баххуыс уыдзæн æмбаргæ равзæрст скæнынæн сæ фидæны профессийы.
Фыццаг бон ма ацыд ахуырадон интенсив, бацæттæ йæ кодтой психологон-педагогон факультеты ахуыргæнджытæ: педагогон наукæты кандидат, педагогон ахуырады кафедрæйы доцент Хадыхъаты Инессæ æмæ педагогон ахуырады кафедрæйы профессор Дзембатты Ларисæ. Специалисттæ скъоладзауты бафтыдтой тынг цымыдисы, дзырдтой сын педагогикæ æмæ психологийы теори æмæ практикон хæсты тыххæй.
«Педагогическая проба» у ЦИПУ æмæ Цæгат Ирыстоны ахуырад æмæ наукæйы Министрады профориентацион проект. Проекты фæлгæтты республикæйы хистæр кълæсты скъоладзаутæ фылдæр базондзысты ахуыргæнæджы профессийы тыххæй, раргом кæндзысты сæ педагогон гæнæнтæ æмæ сæ фидæны профессийæн æмбаргæ равзæрст скæндзысты.
Проекты программæмæ бацыдысты ахуырадон интенсив мастер-класстимæ, тренингтæ æмæ тематикон ахуыртæ ЦИПУ-йы ахуыргæнджытимæ. Программæ ацæуыны фæстæ архайджытæ ратдзысты гом уроктæ республикæйы скъолаты æмæ сæ хатдзæгтæм гæсгæ райсдзысты сертификат. Уымæ гæсгæ сæ бон уыдзæн уæлæмхасæн фондз баллы райсын ЦИПУ-мæ ахуырадон программæйы дæсныйад «Образоване и педагогические науки»-мæ цæугæйæ.
