ЦИПУ-йы ацыд Стъараполы крайы ЦÆК-ы цур фæсивæдон æвзарæн къамисы æмæ Цæгат Ирыстоны фæсивæдон æвзарæн къамисы иумæйаг æмбырд. Æрдзырдтой сæ фæлтæрддзинадыл фæсивæдимæ куысты фæдыл.
Мадзал арæзт æрцыд телемосты хуызы. Архайджытæ æруынаффæ кодтой дарддæры æмгуыстады гæнæнтыл, уыцы нымæцы иумæйаг проекттæ æмæ хъæппæристæ æххæст кæнын. Стъараполы крайы æмгуыстгæнджытæм уæлдай цымыдисаг фæкаст Цæгат Ирыстоны фæсивæдон æвзарæн къамисы фæлтæрддзинад, цалдæр азы æнæфæцудгæ фæстиуджытæ æвдисæг, фæсивæд æвзарæн процессмæ æрбангом кæныны хъуыддаджы. Регионы ахæм структурæ саразыны фæдыл йæ минæвæрттæ бахатыдысты сæ ирон æмгуыстгæнджытæм, цæмæй сын радзурой сæ хуыздæр фæлтæрддзинæдтæ.
Æмбырды архайджытæм арфæйы ныхæстимæ раныхас кодтой Цæгат Ирыстоны Æвзарæн къамисы сæрдар Моргуаты Жаннæ æмæ Стъараполы крайы Æвзарæн къамисы сæрдар Сергей Тарасов. Сæ раныхасы фæбæрæг кодтой фæсивæдон æвзарæн уагдæтты райрæзты нысаниуæг, куыд фæсивæды ‘хсæн æмбæстагон бæрндзинад æмæ закъондзинады культурæ хъомыл кæныны эффективон фæзуат, афтæ ма фæнысан кодтой регионты æхсæн æмархайд æмæ фæлтæрддзинадæй хай кæныны ахсджиагдзинад.
“Махæн æхсызгон у, активон фæсивæд кæй архайынц нысаниуæгджын процессты. Ныфс мæ ис, абон мах кæрæдзийæн кæй хай кæнæм фæлтæрддзинадæй æмæ æрдзурдзыстæм ног хъæппæристæ æмæ проекттыл. Уырны мæ, абон æрмæст хæлардзинад кæй нæ уыдзæн, фæлæ профессионалон æмгуыстад кæй уыдзæн æхсæнадæн пайда”, – загъта Жаннæ.
Цæгат Ирыстоны центрон æвзарæн къамисы цур Фæсивæдон æвзарæн къамис кусы 12 азæй фылдæр. Йæ уæнгты нымæцы сты республикæйы алы уæлдæр ахуыргæнæндæтты минæвæрттæ. Алы æрсидт дæр æххæст кæны дыууæ азы æмгъуыд, къамис та ныртæккæ ис йе ‘хсæзæм æмгъуыды. Азты дæргъы фæсивæдон активизм равдыста йæхи куыд эффективон фæрæз фæсивæдимæ æмгуыстадæн.
Къамисы архайдмæ хауынц ахуырадон æмæ æмбарынгæнæн мадзæлттæ аразын, æвзарæн компанитæ бацæттæ кæнын æмæ дзы архайын, æвзарæн хæйтты кусын, тематикон форумтæ уадзын, фæсивæды архайд æмæ юридикон ахуырдзинад фæбæрзонддæр кæнынмæ здæхт проекттæ æххæст кæнын. Уый тыххæй лæмбынæгдæр æрдзырдта Цæгат Ирыстоны центрон æвзарæн къамисы фæсивæдон къамисы сæрдар Кокойты Аланæ, ЦИПУ-йы студенттæ æмæ Дзæуджыхъæуы Рахизфарсы зылды сæрдар Гапбайты Азæмæт æмæ Цæгат Ирыстоны центрон æвзарæн къамисы фæсивæдон къамисы уæнгтæ Тъуриты Анна æмæ Хъуыдаккаты Герман.
Фембæлды фæткы фæлгæтты архайджытæ æруынаффæ кодтой фæсивæдон æвзарæн къамисты куысты сæйраг фадгуытыл, æрыгæтты æвзарæн процессмæ æрбангом кæныны нырыккон ахастдзинæдтыл, фæсивæдон аудиториимæ куысты нымæцон технологитæй æмæ медиаплатформæтæй пайда кæныныл, регионты ‘хсæн иумæйаг мадзæлттæ æмæ ахуырадон программæты гæнæнтыл.
Фембæлд сарæзта Цæгат Ирыстоны паддзахадон университеты фæсивæды ‘хсæн активон æмбæстагон позицитæ рæзын кæныны, адæмыхæттыты ‘хсæн æмæ динты ‘хсæн конфликттæ ма руадзыны, терроризмы идеологийы ныхмæ тох æмæ экстремизмы профилактикæйы координацион центр.
Молодежные избирательные комиссии Северной Осетии и Ставрапольского края обменялись опытом