Цæгат Ирыстоны Хетæгкаты Къостайы номыл паддзахадон университеты хуымгæнæны 20-24-æм бонты æцæудзæн Крупновы бакастыты XXXIV Æхсæнадæмон зонадон конференци. Мадзалы ныхас цæудзæн Цæгат Кавказы XIX æнусæй XXI æнусы райдианмæ археологон иртæстытæм, йæ традицитæм, æмæ нырыккон ногдзинæдтæм. Крупновы бакастытæ сты сæйраг дунеон зонадон форум, зынгæ æндæвдад кæны археологон наукæйы рæзтыл канд Цæгат Кавказы регионы нæ, фæлæ ма æддейæ дæр. Конференци у сæйраг зонадон платформæ фæстаг раиртæстытæ æмæ иртасæнты фæстиуджытæй хай кæнынæн, ис ын уæрæх хронологион диапазон — дурæнусæй астæуккаг æнусты кæронмæ. Уый зынгæ фæуæрæхдæр кæндзæн регионы истори æмæ культурон алыхуызондзинады æмбарынад.
Ацы аз конференци æрæмбырд кæндзæн 170 специалистæй фылдæр — историктæ, Кавказы археологтæ æмæ палеогенетиктæ. Уыдон амонынц Уæрæсейы, Абхазы, Азербайджаны, Хуссар Ирыстоны, Китайы, Францы æмæ Швейцарийы зонадон, ахуырадон æмæ музейон уагдæттæ.
Кадджын уавæры байгомы церемони уыдзæн хуымгæнæны 20-æм бон 10:00 сахатыл ЦИПУ-йы ЮНЕСКО-йы залы. Пленарон æрбадты рæстæджы хуыздæр уæрæсейаг историктæ æмæ палеогенетиктæ равдисдзысты сæ куыстытæ рагагъоммæйы æфсæн дуджы Цæгат Кавказы цæрджыты ДНК-иртасыны фæдыл, уæрæсейаг археологийы историографи, стæй регионы этнографион æмæ археологон иртасæнты райрæзты бынæттон специалистты нысаниуæг. Уый фæстæ конференци райдайдзæн тематикон секцитæй. Æртæ боны дæргъы архайджытæ æрдзурдзысты археологийы актуалон фæрстытыл сæйраг фæзилæнтæм гæсгæ: дурæнусы æмæ бронзæйы дуджы археологи, рагон æфсæн дуджы æмæ сæрмæтты рæстæджы, стæй Астæуккаг æнусты археологи.
Хуымгæнæны 24-æм бон, кæронбæттæн æрбадты скæндзысты хатдзæгтæ конференцийы куыстæн.
Конференци бацæттæ кодтой РАН-ы Дзæуджыхъæуы зонадон центр, РАН-ы археологийы Институт æмæ РАН-ы материалон культурæйы историйы Институтимæ иумæ.
В Северной Осетии пройдет международная конференция по археологии Северного Кавказа