Джызæлы ДОСААФ-ы фæзуатыл ацыдысты æфсæддон-патриотон кæронбæттæн хъæзтытæ. Архайдтой дзы Цæгат Ирыстоны Хетæгкаты Къостайы номыл паддзахадон университеты
Уæрæсейы ахуырад æмæ наукæйы министрад æмæ ДОСААФ-ы æфсæддон-патриотон хъæзтытæ «Учись побеждать» ауадзыны фæдыл фæлварæн проекты архайынмæ æвзæрст чи æрцыдысты, уыцы æхсæз регионмæ бацыд Цæгат Ирыстон дæр. Æвзарæн процессы фæстиуджытæм гæсгæ равзæрстой 100 студенты Цæгат Ирыстоны паддзахадон университетæй, уыдонæн се ‘рдæг уыдысты чызджытæ. Цалдæр боны дæргъы архайджытæ ацыдысты теоретикон æмæ практикон ахуыртæ хæстон дисциплинæтæй, æхсын æмæ æрдзон парашютæй бырыны бындуртæ аэродромы æмæ æхсæн полигоны фæлтæрдджын инструкторты разамындæй.
Ахуыргæнинæгты архайдæн аргъ скæнынмæ æрбацыд Цæгат Ирыстоны паддзахадон университеты ректор Огъуаты Алан.
“Тынг хорз, цæрдæг, æмæ активон проект, æмæ сæйрагдæр та уый у, æмæ студенттæн æцæгæйдæр æхсызгон у. Ахуыр кæнынц хæцæнгарзимæ архайын æмæ æмбарынц, цæуыл хъæуы кусын физикон цæттæдзинады ‘рдгæй. Уый уæлдай ахсджиаг у 9 майы, Уæлахизы боны агъоммæ. Проект æрбангом кæны студентты, æмæ Уæрæсейы адæмы Иудзинады азы ма иу хатт æвдисы, куыд тыхджын стæм, кæрæдзийæн æххуыс куы фæкæнæм æмæ Райгуырæн бæстæмæ уарзондзинад куы фæхъомыл кæнæм», – фæнысан кодта Огъуаты Алан.
Студенттæ сæхæдæг куыд зæгъынц, афтæмæй хъæзтыты архайын хорз тæлмæнтæ ныууагъта. Бирæтæ дзы бахастой сæ фæндон, цæмæй проект суа æрвылазон мадзал æмæ дзы фылдæр студенттæ архайой.
Финалы архайджытæ хъуамæ равдыстаиккой сæ арæхстдзинад æхсыны дæсныйадæй фондз бынаты. Алы студент дæр æххæст кодта ахуыртæ алыхуызон хæцæнгæрзтæй æртæ позицийæ: æмбæхсæнæй æхсын, магазинтæ ивын æмæ згъоргæйæ æхсын.
Ерысты фæстиуджытæм гæсгæ ма райстой, æфсæддон-патриотон цæттæдзинады программæ кæронмæ кæй ахæццæ кодтой, уый бæлвырдгæнæг сертификаттæ.
Военно-патриотические игры «Учись побеждать» прошли в Северной Осетии