Цæгат Ирыстоны Хетæгкаты Къостайы номыл паддзахадон университеты ректор Огъуаты Алан æмæ республикæйы адæмæн куыст дæттыны Центры директор Дзитъиты Сослан бафыстой æмгуыстады бадзырд, здæхт у профессионалон профориентацийы, ахуыр кæныны, стæй студентты æмæ рауагъдонты куыстæй сифтонг кæнынæн баххуысмæ.
Æмгуыстад арæзт цæудзæн регионалон куысты базарады хъуагдзинæдтыл. Нысангонд цæуы практикæтæ æмæ стажировкæты системæйы арæзт, куыст раттын кæмæн у йæ бон, уыдоны баввахс кæнын ахуырадон процессмæ æмæ кæронбæттæн аттестацимæ, нысанмæздæхт ахуырад фæуæрæхдæр кæнын.
Хъусдард цæудзæн студенттæн куыстмæ бацæуыны æххуысмæ, уыцы нымæцмæ хауынц сæрмагонд миниуджытимæ студенттæ дæр. Уыдонæн баххуыс кæндзысты резюме ныффыссын, комкоммæ ныхасмæ бацæттæ кæнын, профессионалон райрæзт æмæ рæстæгмæ куыст ссарын.
Куыст дæттыны Центр та ифтонг кæндзæн университет куысты базарады аналитикæйæ – æнæмæнгхъæугæ компетенциты бæрæггæнæнтæ, мызды æмвæзад æмæ куыстдæттæджы тыххæй.
Мадзалы архайдтой университеты проректортæ, декантæ æмæ кафедрæты разамонджытæ. ЦИПУ-йы ректор Огъуаты Алан фæнысан кодта, куыстдæттыны Центримæ æмгуыстад стратегион æгъдауæй ахсджиаг кæй у æрмæст рауагъдонты дарддæры куыстæй сифтонг кæнынæн нæ, фæлæ ма ахуырадон процесс куысты базарады домæнтæм гæсгæ аразынмæ дæр.
“Махæн куыст дæттыны Центримæ æмгуыстад у стратегион ахсджиаг, уымæн æмæ цыфæнды университеты сæйраг бæрæггæнæн у йæ рауагъдонты æнтыстджын куыстæй сифтонг кæнын. Мах хъуамæ æмбарæм базарадон домæнтæ, цавæр специалисттæ сты ахсджиагдæр æмæ сын цавæр компетенцитæ хъуамæ уа. ЦИПУ-йы рауагъдонты агурынц æрмæст регионы нæ, фæлæ ма æндæр рæтты дæр. Уыимæ хъæуы æнæмæнг иумæйаг аналитикæ: кæм кусынц рауагъдонтæ, сæ мызды æмвæзад цавæр у, сæ ацыдыл чи ахады, уыцы хъæндзинæдтæ фæиуварс кæнын. Кадрты цæттæ кæныны æмæ адæймаджы рæзты бавæрæны фарст регионæн у сæйраг», — загъта Огъуаты Алан.
Дзитъиты Сослан фæбæрæг кодта, æвзонг специалистты куыстæй сифтонг кæнын кæй у уагдонæн сæйрагдæр, æмæ не ‘мгуысты хæрзхъæддзинадæй аразгæ у сæ профессионалон фидæн æмæ республикæйы рæзт.
“Мах нæхирдыгæй æппæт тыхтæй дæр архайдзыстæм, цæмæй ЦИПУ-йы рауагъдонтæ ссарой куысты бынæттæ сæ дæсныйадмæ гæсгæ æмæ райгонд уой сæ профессионалон рæзтæй. Республикæйы организацитæ квалификациджын кадртæй сифтонг кæнын у махæн сæйраг. Ныфс нæ ис, ацы бадзырд нæ иумæйаг куыстæн ног разæнгард кæй ратдзæн”, – загъта Дзитъиты Сослан./
СОГУ и Центр занятости Северной Осетии договорились о сотрудничестве в трудоустройстве студентов