Цæгат Ирыстоны паддзахадон университеты экономикæ æмæ менеджменты факультеты студенттæ æмæ ахуыргæнджытæ архайдтой парламентон байхъуыстыты, уынаффæ кодтой туризмы къабазы кусджытæ цæттæ кæнынимæ баст актуалон фæрстытыл.
Факультеты декан Геннадий Родионовы ныхæстæм гæсгæ, фембæлды фæнысан кодтой, Цæгат Ирыстон зынгæ кæй фæивта национ проекттæ æмæ паддзахадон программæты фæрцы.
«Абон туризм у æцæг райрæзты драйвер æнæхъæн республикæйæн. Национ проекттæ æмæ паддзахадон программæты фæрцы Цæгат Ирыстоны горæттæ æмæ хъæутæ бæрæг раивтой: цалцæггонд фæндæгтæ, нырыккон парктæ, хæрзарæзт æхсæнадон фæзуæттæ регионæн æнцондæр кæнынц куыд цæрджытæн, афтæ уазджытæн дæр. Фæлæ индустрийы рæзтимæ æвзæры ног хæстæ. Сæйрагдæртæй иу – бæрзонд æмвæзады лæггæдтæ дæттыны æмæ туристон инфраструктурæ рæзын кæныны фадат кæмæн ис, ахæм кадртæ», – загъта Геннадий Родионов.
Байхъуысты ма раныхас кодта экономикæ æмæ разамынды факультеты магистрант æмæ РЦИ-Аланийы экскурсоводтæ æмæ гид-тæлмацгæнджыты ассоциацийы сæрдар Вячеслав Санников. Уый æрсидт «традицион кувæн бынæтты» статус закъонмæ гæсгæ ныффидар кæнын æмæ æнæаттестацигонд «сау» фæндагамонджыты куыст бауромынмæ. Уый ахъаз уыдзæн бынæттон цæрджытæ æмæ туристты ‘хсæн æнæмбарынад ма æруадзынæн æмæ сæрмагонд табуйаг нысаниуæг кæмæн ис, ахæм бынæтты уагахасты бæлвырд фæтк сфидар кæнынæн. Уый ма фæнысан кодта фæстаг азы дæргъы Цæгат Ирыстонмæ туристон змæлд кæй фæкъаддæр, йæ хъуыдымæ гæсгæ, баст у авиабилеттæ æмæ цæрæнуæтты æргътæ кæй фæбæрзонддæр сты, уый аххосæй.
Конструктивон дискусситы рæстæджы студенттæ æмæ профессионалон æхсæнад рахастой бирæнымæц хъуыдытæ æмæ фæндæттæ. Архайджытæн загътой бузныг сæ активон ахасты тыххæй æмæ бахахх кодтой, æрмæстдæр иумæйаг хъарутæй Цæгат Ирыстоны туризм ноджы цымыдисондæр, нырыккондæр æмæ зæрдæмæдзæугæдæр кæй ис скæнæн.
Студенты СОГУ приняли участие в парламентских чтениях по вопросам туризма