ЦИПУ-йы зонадон библиотекæйы арæзт æрцыд фембæлд студенттæ æмæ бизнес-экспертты ‘хсæн, цæмæй æруынаффæ кæной социалон æгъдауæй пайда чи хæссы, ахæм амалиуæгад саразыны нырыккон гæнæнтыл. Дискусси «Карьерный навигатор: за кулисами инвестиционных проектов» бацæттæ кодта ЦИПУ-йы карьерæйы центр, цæмæй студенттæн баххуыс кæна карьерæйы фадæттæ хуыздæр бамбарынæн æмæ инвестицион проекттимæ куысты практикон æмбарынад райсынæн.
Æмбырды архайджытæн арфæ ракодта ЦИПУ-йы фæсивæдон политикæ æмæ административон куыстæй проректор Кокайты Алан. Уый бузныджы ныхæстæ загъта уазджытæн сæ балцы тыххæй æмæ фæнысан кодта ахæм фембæлдты ахсджиагдзинад, студенттæн фадат кæм ис ахадгæ уынаффæтæ райсынæн æмæ профессионалон рæзтæн уæлæмхасæн разæнгарддзинад.
Эксперттæ уыдысты физкультурæ æмæ спорты инвесторты ассоциаци «Прорыв»-ы президент æмæ паддзахадон-сæрмагонд æмгуыстады федералон эксперт Еленæ Сандакова æмæ Дзгойты Дмитрий, амалхъом, хæрзаудæн адæймаг, «Алания Атлетик»-ы ерысты академийы президент, Республикæ Цæгат Ирыстон-Аланийы Адæмон фронты æмсæрдар æмæ регионалон уагдон «Опора России»-йы хайады сæрдар.
Елена Сандакова радзырдта паддзахадон-сæрмагонд æмгуыстады сæйраг фадæттыл, сæ практикон æууæлтыл, æмæ къабазы рæзты сæйраг здæхтыл. Уый куыд зæгъы, афтæмæй хицауад æмæ бизнесы æхсæн æмгуыстады ацы механизм фадат дæтты социалон нысаниуæгджын фæрстытæ æмрæстæджы æрбæстон кæнынæн æмæ инвестортæн æфтиæгтæ æрхæссынæн.
Дзгойты Дмитрий бамбарын кодта, бизнес æмæ хицауады æмархайд практикæйы куыд кусы, сæрмагондæй социалон нысаниуæг кæмæн ис, ахæм проектты фадыджы, уыцы нымæцы спортивон инфраструктурæйы райрæзты. Уый ма дзырдта йæхи фæлтæрддзинад, амалхъомдзинады фæндагыл æмæ цы хъæппæристæ æххæст кодта, уыдоны тыххæй. Фæнысан кодта, ацы къабазы чи кусы, уыцы амалхъом адæм канд æфтиагмæ нæ, фæлæ социалон пайдамæ дæр кæй хъуамæ тырной. Уый ма студентты разæнгард кодта, цæмæй ма тæрсой бæллынмæ, æвæрой нысæнттæ æмæ ныфсджынæй цæуой сæ сæххæстмæ.
Сæйраг хайы фæстæ фембæлд арæзт æрцыд «фарст-дзуапп» æмæ бизнес-терминологийæ викторинæйы хуызы. Студентты цымыдис кодтой ахæм фæрстытæ: куыд райдайæн ис сæхи бизнес, куыд равзарæн ис бизнесы здæхт, паддзахадон-сæрмагонд æмгуыстады спецификæ, æмæ нырыккон профессионалæн цы миниуджытæ хъæуы, уыдон.
Мадзалы фæстиуджытæм гæсгæ иууыл активондæр æмæ зондджындæр архайджытæ райстой зынаргъ лæвæрттæ. Физкультурæ æмæ спорты факультеты студенты викторинæйы хатдзæгтæм гæсгæ схорзæхджын кодтой MacBook-æй. Раныхасгæнджытæм хуыздæр фæрстытæ раттыны фæдыл лæвæрттæ ма уыдысты айпод æмæ атлетикон спортивон центр «Алани»-йы афæдзы дæргъы архайды бар.
