Æртæ мин метры бæрзæндæй къахдзоныгътыл рауагъдæй сбæрæг кодта Цæгат Ирыстоны паддзахадон университет ног студентон спортивон клуб «Алания»-йы байгом туристон-рекреацион курорт «Мамисон»-ы.
Клубы нысан у студентты ‘хсæн æнæниз цардыуаг æмæ спорт парахат кæнын. Раздæр куыста куыд студентон æхсæнадон иугонд æмæ ахъаз уыд спорты хуызты райрæзтæн, куыд баскетбол, волейбол, теннис, мини-футбол æмæ уæгъдибар хъæбысхæст. Реорганизацийы фæстæ бацыд университеты официалон структурæйы хаймæ æмæ йын фæзынд фадат йæ куыст фæуæрæхдæр кæнынæн. Уымæй уæлдай ма ног клубы ныр уыдзæн къахдзоныгътыл бырыны хайад дæр.
Кадджын уавæры мадзалы байгомы архайдтой университеты разамонджытæ æмæ кадджын уазджытæ: Кавказ.РФ-ы лæггадгæнæг директоры хæдивæг Хасан Бастанов; хæрзаудæг æмæ Уырыссаг географион æхсæнады фæкæсæг советы уæнг Цæлыккаты Хъазыбг; фæсивæдон политикæ æмæ административон куыстæй проректор Кокайты Алан; ЦИПУ-йы ректоры уынаффæгæнæг æмæ дзюдойæ Европæйы фондз хатты чемпион Тменаты Тамерлан; спортивон клубы директор Махъиты Анзор; физкультурæ æмæ спорты факультеты декан Дмитрий Карасев, студенттæ æмæ университеты спортивон активисттæ. Кадджын мадзалы рæстæг бакастысты Уæрæсейы наукæ æмæ уæлдæр ахуырады министры хæдивæг Петрова Ольгæйы арфæйы фыстæг.
“Клубы чи архайы, уыдонæй алкæмæн дæр мæ зæрдæ зæгъы ног уæлахизтæ, разæнгарддзинад æмæ хъару ныфсджын спортивон проекттæ æххæст кæнынæн. Уадз æмæ «Алания» суа ахæм бынат, уæлахизтæ кæм гуырынц, кæм фидардæр кæны командон удварн, æмæ рæзы спорт университеты алы æмвæзадыл дæр“, — дзырд цæуы хъусынгæнинаджы.
ЦИПУ-йы ректор Огъуаты Аланы номæй раарфæ кодта йæ хæдивæг Кокайты Алан. Уый фæнысан кодта, зæгъгæ, клубы сырæзт здæхт у студентон спорты райрæзтмæ, æнæниз цардыуаг парахат кæнынмæ, стæй бæрзонд æнтыстджын спорты хуызтæн æххуыс кæнынмæ.
“ЦИПУ у регионы раззагдæр университеттæй иу. Нæ университет рауагъта бирæ олимпаг чемпионтæ, кæцытæй абон сæрыстыр у нæ бæстæ. Ацы диссаджы традици адарддæр кæныны тыххæй гом кæнæм спортивон клуб. Уый фæуæрæхдæр кæндзæн фадæттæ студенттæн, фæтыхджындæр кæндзæн куыд дзыллон, афтæ профессионалон спорты рæзт, сараздзæн ног командæтæ æмæ лигæтæ”, – фæнысан кодта Кокайы Алан.
Официалон церемонийы фæстæ архайджытæ схызтысты «Зæрæмæг-1» станцæмæ, денджызы æмвæзадæй 2950 метры бæрзæндыл.
Уырдыгæй Уæрæсейы, Цæгат Ирыстоны, Уæрæсейы ахуырады министрады, ЦИПУ-йы, Уæрæсейы студентон спортивон клубты ассоциацийы æмæ Уæрæсейы студентон спортивон цæдисы тырысатимæ, уæрæсейаг триколоры хуызты уæлæдарæсы иумæ рауагътой къахдзоныгътыл. Спайда кодтой фæздæгуадзæн шашкæтæй æмæ уымæй мадзал адæймагмæ æвзæрын кодта диссаджы символикон æнкъарæнтæ.
СОГУ отметил открытие студенческого спортклуба на высоте 2950 м