Цæгат Ирыстоны Национ музейы 30 апрелы 17:00 сахатыл байгом уыдзæн иумæйаг равдысты проект «Созвучие». Байгом æй кæндзысты Уæрæсейы нывгæнджыты Цæдисы уæнг æмæ ЦИПУ-йы аивæдты кафедрæйы доцент Биганти Зæринæ æмæ йæ чызг, университеты актерон хайады рауагъдон Цæболты Дианæ.
Равдысты фенæн уыдзæн Биганти Зæринæйы 25 нывы æмæ Цæболты Дианæйы 15 хуызисты.
Зæринæйы нывтæ æххæстгонд цæуынц экспрессивон æгъдауæй, пастозон техникæйæ пайда кæнгæйæ, æмæ здæхт сты лирикон абстракцимæ. Гармони, фарн æмæ алыварс дунейы рæсугъддзинад сты йæ уацмысты сæйраг темæтæ. Нывгæнæг иу кæны реалистон элементтæ æцæгдзинады поэтикон æмбарынад æмæ дзы адæймагдзинады бынат. Хуызон æнæхин нюанстæ, хъусдард полотнойы текстурæмæ æмæ вазыгджын композици дæттынц фадат нывгæнæгæн йæ миддуне равдисын символизм, аллегори æмæ формæйы уникалон цæстæнгасæй.
Цæболты Дианæйы хуызистытæ проектмæ хæссынц ног æмæ нырыккон цæстæнгас. Йæ куыстыты æвдыст цæуынц æрдзы абстрактон нывтæ, æмæ нын фадат дæттынц зонгæ ног, æнæнхъæлæджы цæстæнгасæй фенынæн. Рухс æмæ аууоны, æрдзон формæты ритмты æмæ текстурæты æмгуыстады фæрцы нывгæнæг раиртасы гармони æмæ мидис æвæццæгæн хаосы, аразы экспрессивон цæстуынгæ нывтæ.
«Алы æрмæг дæр у дунейы æмбарынады æмæ æнкъарæнты фæд, кæцытæ аразынц нывгæнæджы сæрмагонд æцæгдзинад. Уыцы æцæгдзинад ахизы кæсæгмæ æмæ свæййы проекты ахсджиаг хай.
Æгæрон тыгъдады адæймаг у хъæздыг цæхæрадоны дидинæджы хуызæн – алыхуызондзинад æмæ æнахуырдзинады метафорæ. Алы адæймаг дæр æрхæссы йæхи рухс, йæ æнахуырдзинад æмæ йæ уды æнæфæцудгæдзинад иумæйаг нывмæ. Уый у царды алы уысмы дæр йæ уæвынадыл сразы уæвын»,- фæнысан кодта Биганти Зæринæ.
Равдыст йæ куыст кæндзæн 31-æм маймæ.