Цæгат Ирыстоны Хетæгкаты Къостайы номыл паддзахадон университеты райдыдта æрвылазон фестиваль “Наукæйы бонтæ”. Ацы егъау зонадон-ахуырадон мадзал æрæмбырд кодта студентты æмæ ахуыргæнджыты алы факультеттæй дæр.
Æхсæнадæмон ахастыты факультеты студенттæ равдыстой цыппар хайæ арæзт зонад-иртасæн куыстытæ. Архайджытæ се ‘ргом аздæхтой когнитивон лингвистикæ æмæ лингвистон поэтикæмæ, методологи æмæ лингводидактикæмæ, лексикологимæ, лексикографимæ, æмæ æхсæнкультурон коммуникацимæ, афтæ ма теоретикон грамматикæмæ æмæ тæлмацы теори æмæ практикæмæ. Факультеты ма уагъд цыдысты бизнес-хъæзтытæ экономикон темæтыл, уыдоны нымæцы викторинæ «Кто хочет стать миллионером?», тренинг «Купи слона!» студенттæ æрхъуыды кодтой царды аргъ æндæр бæстæты, æмæ видеовикторинæ «Фейк или Правда» дунеон экономикæйы æнахуырдзинæдты тыххæй.
Экономикæ æмæ менеджменты факультеты «Туризм»-ы хайады студенттæ Уæрæсейы Федерацийы Хицауады цур Финансон университеты студенттимæ иумæ равдыстой сæ иртасæн куыстытæ регионалон экономикон æмæ социалон системæты менеджменты фæдыл. Цалынмæ дискусситæ нæ райдыдтой, уæдмæ æрыгон ахуыргæндтæн сарæзтой разæнгардгæнæн интерактивон сеанс «Я б в ученые пошел!» æмæ брейн-ринг «Знатоки туризма», сбæрæг кодтой æрмæст сæ теоретикон зонындзинæдтæ нæ, фæлæ ма сæ æрхъуыдыджындзинад дæр фæлваргæйæ.
Наукæйы бонты программæйы дыккаг бон, 28 апрелы, адарддæр уыдзæн алыхуызон мадзæлттæй. Программæйы ис Уæрæсейы парламентаризмы 120 азы юбилейы фæдыл æрбадт журналистикæйы факультеты, ирон филологийы факультеты Абхазы паддзахадон университетимæ телеконференци, уырыссаг филологийы факультеты ахуыргонд Девлет Гиреевы номарæн æрбадт, афтæ ма зонадон конференцитæ, хъæзтытæ, квизтæ, викторинæтæ æрдзон зонæдты, юридикон, экономикæйы æмæ менеджменты факультетты.
Наукæйы бонтæ фæуыдзысты 29 апрелы 2025 азы зонад-иртасæн конкурсты уæлахиздзауты хорзæхджын кæныны церемонийæ ЦИПУ-йы ЮНЕСКО-йы Конференц-залы.
