Цæгат Ирыстоны Хетæгкаты Къостайы номыл паддзахадон университеты системон экологон анализы лабораторийы хистæр зонадон кусæг æмæ медицинон наукæты кандидат Дзампаты Жаннæ райста грант СНГ-йы бæстæты зонадон-техникон æмгуыстады æхсæнпаддзахадон инновацион центрæй бæрзонд энергийы ифтыгъд хайыгтæ æмæ рентгены тынтæ адæймаджы гæрæнон функцитыл куыд æндавынц, уый иртасыны тыххæй.
Центр æрвылаз дæр уадзы грантон конкурс æрыгон ахуыргæндтæн зонадон æмæ инновацион проекттæ аразынæн, йæ нысан у бæрзондтехнологон проекттæ равзарын сæ дарддæры раиртæстæн æхцайы фæрæзтæ рахицæн кæныны фæдыл.
Иртасæнæн йæ бон бауыдзæн бамбарын кæнын, куыд ивынц адæймаджы гæрæнон уæфты хъахъхъæнæн функцитæ космосон мисситы рæстæджы уæззау ифтыгъд хайыгты æндæвдадимæ. Сæрмагондæй, æндæвдад æвзæрст цæудзæн куыд гæрæнон уæфты клеткæтыл (царм, улæфæнты, артæнты æмæ тугдадзинты къулты сæтцъар) афтæ æнгæс микрофлорæйыл, уымæн æмæ патогентæн сæ бон у суæвын агрессивондæр æмæ антибиотиктæн ныхмæлæууæг. Иртæст хъуамæ уагъд æрцæуа ахæм клеткæты рæгъыл, куыд кератиноциттæ, эндотелиоцидтæ æмæ цармы фибробласттæ.
Иртасæны фæстиуджытæ уыдзысты ног бындурон бæрæггæнæнтæ гæрæнон уæфты дисфункцийы молекулæйон æмæ клеткæйон механизмты тыххæй æмæ бактериты патогенондзинады æмæ антибиотикты ныхмæлæуды ивддзинæдты тыххæй. Ацы хатдзæгтæ уыдзысты бындур ног методтæ аразынæн инфекцитæ рабæрæг кæнынæн, профилактикæ æмæ хос кæнынæн дæргъвæтин космосон мисситы рæстæджы. Уымæй уæлдай ма, хатдзæгтæ спайда кæндзысты æрдзон медицинæйы, цæмæй дзæбæх кæной инфекцион фæкарздæргæнæнтæ æвзæр низтæн радиацион терапийы фæстæ.