Цæгат Ирыстоны Хетæгкаты Къостайы номыл паддзахадон университеты ЮНЕСКО-йы залы ацыд лекци-семинар Цæгат Ирыстоны Æвзарæн къамисы кусджытæн. Сæйраг докладгæнæг уыдис Уæрæсейы Федерацийы Уæлрадон æмæ Æххæстбарджын минæвар, философийы зонæдты доктор, зындгонд паддзахадон æмæ æхсæнадон архайæг Рамазан Абдулатипов.
Фембæлды темæ уыд «Российская модель обустройства народов и граждан России в едином государстве». Лектор йæ хъус æрдардта нациты æхсæн æмæ динты æхсæн ахастытыл уæрæсейаг паддзахаддзинады рæзты контексты, стæй бæстæйы уникалон бирæнацион структурæйы равзæрды историон æууæлтæм. Рамазан Абдулатипов йæ раныхас сарæзта, Уæрæсейы адæмты иудзинадæн нывондæн раздæр мыхуыры цы чингуытæ рацыд, уыдонмæ гæсгæ.
Мадзал сарæзта Уæрæсейы æхсæнад «Знание». Æрæмбырдуæвджытæн дзурæджы бацамыдта Цæгат Ирыстоны паддзахадон университеты ректор æмæ Æхсæнад «Знание»-йы регионалон хайады сæрдар Огъуаты Алан. Уый фæнысан кодта, зæгъгæ, Рамазан Абдулатиповы лекци лæууыд бæстæйы нырыккон национ политикæйы бындурыл, исы сæрмагонд символикон нысаниуæг Уæрæсейы адæмты иудзинады азы.
«Цæгат Ирыстоны паддзахадон университеты фæзуат дæтты фадат абон бæстæйы цы сæйраг процесстæ цæуы, уыдон равдисынæн. Иуæй ныхас кæнæм, сæрыстыр кæмæй уæм, ахæм æнтыстытыл – нæ бæстæйы, регионты æмæ хицæн адæймæгты æнтыстытæ алыхуызон фадгуыты æхсæнадæмон аренæйыл. Рамазаны хуызæн раныхасгæнджытæ, сæхæдæг дæр йæ райдианы кæмæн лæууыдысты, уыцы процесстæм æфтауынц фæлгъуызтæ. Уый нын фадат дæтты фæстæмæ æркæсын националон политикæмæ æмæ нæ æмбстæгтæн цы равзæрст скæнын хъæуы, уымæ. Не взарæн къамисты кусджытæ цы арф зонындзинæдтæ райсой, уымæй аразгæ у сæ профессионализм, бынæтты куыст æмæ адæмы æууæнк», – загъта Огъуаты Алан.
Ректор ма фæнысан кодта, зæгъгæ, ахæм фембæлдтытæ хицауады фæлтæрд кусджытимæ æххуыс кæнынц йæ бынаты алкæмæн дæр бамбарынæн, æппæт бæстæйæн иумæйаг фæстиуæг кæй баст у сæхи хайбавæрдæй.
