ЦИПУ-йы байгом историон-документалон равдыст «Битва за Кавказ». Арæзт у Фыдыбæстæйы Стыр хæсты сæйраг тохтæй иуæн. Равдысты ис 20 стендæй фылдæр фронты æфсæддонты хуызистытимæ, афтæ ма уыцы рæстæджы архивон документтæ, се ‘хсæн æфсæддон архæйдтыты пълантæ æмæ картæтæ.
Проекты сæрмагонд миниуæг у йæ бынат ивынад – цæугæ равдыст федтой регионы бирæ ахуыргæнæндæтты, стæй республикæйы Уæлдæр тæрхондоны дæр. Абон равдыстимæ базонгæ кодтой ЦИПУ-йы журналистикæйы факультеты фыццæгæм курсы студентты, стæй республикæйы административон оргæнты минæвæртты. Студенттæ æмæ уазджытæн экскурси сарæзта журналистикæйы факультеты декан Хæбæлаты Фатимæ.
«Ацы равдыстæн ис стыр нысаниуæг абон, 81 азы юбилейы агъоммæ, уымæн æмæ стендтыл цы информаци ис, уый кæддæриддæр уыд æмæ уыдзæн актуалон. Æхсызгон нын у стыр цымыдисдзинад æм кæй ис: бирæ ахуырадон уагдæттæ æмæ организациты бафæндыд экспозицимæ бакæсын. Нæ фыццаг курсы студентты æнæмæнг йемæ базонгæ кæнæм. Уый у бавæрæн бирæнацион адæмы хъайтардзинады тыххæй зонындзинæдтæ парахат кæнынмæ, уымæн æмæ сæ тугæй бахъахъхъæдтой Дзæуджыхъæумæ æрбахизæнтæ. Махæн нæ хæс у ацы цаутæн æмæ нæмттæн кад кæнын æмæ сын сæ хорз хъуыддæгтæ адарддæр кæнын. Абон сæрмагонд хæстон операцийы не ‘фсæддонтæ æххæст кæнынц Фыдыбæстæйы хæдбардзинад хъахъхъæныны уæлдæр мисси, æмæ уыцы нæмттæ хъуамæ цæрой æнустæм», – загъта Хæбæлаты Фатима.
Равдыст арæзт æрцыд фонд «История Отечества»-йы æххуысæй æмæ йæ нысан у фæсивæды ‘хсæн хъомыладон куыст фæтыхджындæр кæнын.
