Цæгат Ирыстоны Хетæгкаты Къостайы номыл паддзахадон университеты профессионалон цæттæдзинад райсдзысты студентон командæты уæнгтæ. Курсы фæлгæтты фыццаг ахуыр ацыд 18-æм майы.
Раздæр ЦИПУ сси Æппæтуæрæсеон фæсивæдон æхсæнадон организаци «Уæрæсейы студентон командæтæ»-йы грантты конкурсы уæлахиздзау. Цы фæрæзтæ рамбылдтой –200 мин соммæ ‘ввахс – уыдон бахардз кæндзысты, сæрдыгон рæстæг æнæхъæн Уæрæсейы сывæллæтты æнæниздзинад хъахъхъæныны лагерты чи кусдзæн, уыцы студентты профессионалон цæттæдзинадыл.
ЦИПУ-йы кадрты зонындзинæдтæ фæбæрзонддæр кæныны æмæ ногæй цæттæгæнæн центры директор Бырнацты Фатимæ студенттимæ æрдзырдта организацион фæрстытыл æмæ ахуыры нысæнттыл. Уый фæнысан кодта университеты нырыккон историйы фыццаг отрядты сæрмагонд мисси.
«Студентон командæтæ кæддæриддæр уыдысты студентон царды æнæфæхицæнгæнгæ хай. Мах ныртæккæ стæм ЦИПУ-йы студентон командæтæ сног кæныны райдианы. Сымах ныридæгæн бацыдыстут нæ университеты нырыккон историмæ. Стут фыццаг студентон отряд Цæгат Ирыстоны паддзахадон университеты нырыккон историйы. Арфæ уын кæнæм уый фæдыл. Кæмфæнды ма уат – республикæйы мидæг кæнæ йæ арæнтæй дарддæр, сымах æвдисут нæ университет, нæ культурæ æмæ нæ адæмы стыр бæрндзинад. Сымах суыдзыстут уынаффæгæнджытæ, хистæр æмбæлттæ, лæппутæн æмæ чызджытæн ахуыргæнджытæ», – дзырдта архайджытæн Бырнацты Фатимæ.
Ахуыртæ цæудзысты иу мæй – 18-æм майæ 18-æм июнмæ. Студенттимæ ахуыртæ цæудзысты педагогон ахуырады кафедрæйы доценттæ Цорæты Фатимæ æмæ Бобылева Ларисæйы æххуысæй. Хъусджытæн ма ис сæрмагонд «методикон копилкæ» – онлайн-æмбырдгонд методикон æрмæджытимæ, ахуырадон пособитимæ æмæ уынаффæгæнæджы куыстæн ахъаззаг сервистимæ.
Курсы кæрон фидæны уынаффæгæнджытæ ратдзысты фæлварæн æмæ райсдзысты паддзахадон æвдисæндар «Уынаффæгæнæг». Сæрдыгон рæстæг сæ бон уыдзæн Уæрæсейы Федерацийы сывæллæтты дзæбæхгæнæн лагерты кусгæйæ, цы дæсныйæдтæ райстой, уыдонæй спайда кæнын.
В СОГУ стартовал курс профессионального обучения участников студенческих отрядов